Ձեր վստահելի աղբյուրը

««Հանրապետական կուսակցությանը» միակ այլընտրանքային ուժը «Ծառուկյան» դաշինքն է, միակ ընդդիմադիր ուժը, որը կարող է մրցակցային պայմաններում հաղթել ՀՀԿ-ին»,- այսօր լրագրողների հետ հանդիպմանը նման կարծիք հայտնեց ՀՀՇ վարչության նախագահ,  «Ծառուկյան դաշինք»-ի առաջադրած  թեկնածու Արարատ Զուրաբյանը։

Հետընտրական համագործակցություններին անդրադառնալով՝ նա չբացառեց համագորակցությունը որևէ քաղաքական ուժի հետ, սակայն նշեց, որ ավելի մեծ է ընդդիմադիր քաղաքական դաշտի հետ համագործակցության հնարավարությունը։

Հարցին, թե հնարավոր է նախորդ տարիների փորձը հաշվի առնելով « Ծառուկյան» դաշինքը  իշխանություն կազմելու համար ՀՀԿ-ի հետ կոալիցիա կազմի, Զուրաբյանը պատասխանեց. «Չեմ ցանկանա մարգարեի դեր ստանձնել: Մի բան ակնհայտ է, որ 2012-ին ծանրակշիռ է եղել առաջարկը, բազմակի նախարարություններ, մարզպետների նշանակումներ, բայց Ծառուկյանը հայտարարել է, որ չի պատրաստվում դաշինք կազմել: Հիմա նա փորձում է, որ ՀՀ-ում տեղի ունենան փոփոխություններ, ես կարծում եմ գնալու ենք այս ճանապարհով և հաջողություն արձանագրենք»։

Լրագրողների դիտարկմանը՝ թե Ծառուկյանի շուրջ համախմբումը ունեցվածքի շուրջ է, թե գաղափարի, թե ՀՀՇ վարչության նախագահը նշեց, որ ցանկացած համախմբման դեպքում էլ նույնը կարող են ասել. «Շատերն ունեն ֆինանսական միջոցներ, բայց Ծառուկյանին հաջողվել է քաղաքական թիմ ձևավորել»։

Ինչ վերաբերում է Սեյրան Օհանյանի՝ քաղաքականությամբ զբաղվելուն, Զուրաբյանն ասաց, որ ինչպես ցանկացած ՀՀ քաղաքացի, նա նույնպես իրավունք ունի զբաղվել քաղաքականությամբ. «Ցավում եմ, որ նա, լինելով փառապանծ ճանապարհ անցած զինվորական, գեներալ-գնդապետ, նախկին պաշտպանության նախարար, երբևէ չի զբաղվել քաղաքականությամբ: Իր համար  մի քիչ օտար գործառույթ է եղել քաղաքականությունը։ Սա նրա առաջին փորձն է, և այդ անունն արդեն որոշակի բան ասելու է ընտրողին: Դաշինքից Օսկանյանը, Հովհաննիսյանը քաղաքական փորձ ունեն, հաջողություն եմ մաղթում իրենց, բայց իմ գնահատմամբ շատ մեծ արդյունքներ չեն գրանցի»։