Վինեյ Սալդանա. Հայաստանն արդյունավետորեն է պայքարում ՄԻԱՎ/ՁԻԱՀ-ի դեմ

Առողջություն 16:32 23/02/2017

Վինեյ Սալդանա. Հայաստանն արդյունավետորեն է պայքարում ՄԻԱՎ/ՁԻԱՀ-ի դեմ

«Արևելյան Եվրոպայի և Կենտրոնական Ասիայի տարածաշրջանում Հայաստանն առանձնանում է ՄԻԱՎ վարակի դեմ արդյունավետ պայքարով։ Դրա վկայությունն է, որ Հայաստանն աշխարհի այն 4 երկրներից մեկն է, որոնք Առողջապահության համաշխարհային կազմակերպության կողմից արժանացել են մորից երեխային ՄԻԱՎ-ի փոխանցման վերացման հավաստագրի»:

Առողջապահության նախարար Լևոն Ալթունյանի հետ հանդիպմանն ասել է ՄԱԿ-ի ՄԻԱՎ/ՁԻԱՀ միացյալ ծրագրի Արևելյան Եվրոպայի և Կենտրոնական Ասիայի երկրների տարածաշրջանային տնօրեն Վինեյ Սալդանան:

Նաև հույս է հայտնել, որ Հայաստանը տարածաշրջանում առաջիններից մեկը կլինի, որ, առաջնորդվելով ԱՀԿ-ի վերջին ուղեցույցներով, 2017 թվականից կսկսի բուժում տրամադրել ՄԻԱՎ-ով ապրող բոլոր անձանց:

Նախարարության հասարակայնության հետ կապերի վարչության փոխանցմամբ, ՄԱԿ-ի ներկայացուցիչը նշել է, որ ԱՊՀ տարածքում, մասնավորապես` Ռուսաստանի Դաշնությունում շարունակվում է ՄԻԱՎ վարակի նոր դեպքերի աճ արձանագրվել։ Մինչդեռ շատ երկրներում հիվանդության տարածման անկում է գրանցվում, մահվան դեպքերը նվազագույնին են հասցվում։ Եվ 2016 թվականից շեշտը դրվում է ոչ թե հիվանդության դեմ պայքարի, այլ վարակը կասեցնելու վրա։

Նախարարը և տարածաշրջանային տնօրենը պայմանավորվել են ՄԱԿ-ի ՄԻԱՎ/ՁԻԱՀ միացյալ ծրագրի աջակցությամբ նրանց հետ համագործակցող միջազգային կառույցների և աշխարհում ճանաչված դեղարտադրող ֆիրմաների հետ իրականացնել ներդրումային ծրագրեր, մասնավորապես` դեղարտադրության և գնումների ոլորտում։

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: