Ձեր վստահելի աղբյուրը

«Երկար տարիների ընթացքում մեր բանակում բացառված է եղել քաղաքական ռեսուրսի շահարկումը»,-այսօր լրագրողների հետ ճեպազրույցում ասաց պաշտպանության նախարար Վիգեն Սարգսյանը` պատասխանելով հարցին, արդյոք մտավախություն չկա՞ որ զինծառայողները ստիպված կլինեն ընտրել քաղաքական ուժին, որի ցուցակը գլխավորում է ինքը:

Նրա խոսքով՝ պաշտպանության նախարարի կուսակցական լինելը մի կողմից թվում է, թե առավելություն է` մյուս կողմից պետք է հասկանալ, որ այն բոլոր խնդիրները, որ կան բանակում, ու չլուծված հարցերը, դրանք ևս կապում են քաղաքական այն կուսակցության հետ, որն ինքն է ներկայացնում։

«Բանակում չի լինելու քաղաքական կուսակցությունների գործունեության զարգացում։ Իսկ եթե զինվորները որոշեն, որ պաշտպանության նախարարը լավ է կատարում իր աշխատանքը և որոշեն քվեարկել այն կուսակցությանը, որի նախընտրական ցուցակն եմ ես ղեկավարում, դա իրենց քաղաքացիական իրավունքն է», - ընդգծեց նա:

Վիգեն Սարգսյանն ընդգծեց՝ բանակը չի ուղորդվել ու չի ուղորդվի քվեարկության ժամանակ:

ՀՀԿ ցուցակում Միհրան Պողոսյանի ընդգրկվելու վերաբերյալ նա նշեց, որ իր բոլոր կուսակից գործընկերներին վերաբերում է խորը հարգանքով. «Նրանցից յուրքանաչյուրն անցել է իր ճանապարհը և այս պահին իր ընտրատարածքում կարող է մրցել ձայների քանակի համար, ես չեմ տեսնում դրա մեջ որևէ խնդիր»։

Ինչ վերաբերում է հարցին, թե ինչպե՞ս է հասցնելու նախարարի պարտականությունների հետ միասին քարոզչական աշխատանքներ կատարել, Վիգեն Սարգսյանն ասաց. «Շատ պարզ, իմ աշխատանքային օրը շատ ժամանակ սկսվում է առավոտյան 6:30-ից մինչև երեկոյան 11։30-ը, և ես կարծում եմ՝ դրա մեջ բավական ժամանակ կա, որ ես իմ աշխատանքային պարտականությունից բացի այն գործով, որը որպես կուսակցության ցուցակի առաջին համար պարտավոր կլինեմ կատարել քարոզարշավի ընթացքում»։