Ձեր վստահելի աղբյուրը

Գալիք ընտրությունների վրա կաշառքի ազդեցությունը չափազանցված է, -այսօր լրագրողների հետ հանդիպմանը նման կարծիք հայտնեց սոցիոլոգ Ահարոն Ադիբեկյանը։

«1 200 000 մասնակցին կաշառելն անհնար է, մի՛ խարսխվեք դրա վրա։ Ընտրողների կեսն իշխանամետ է և ընտրություններին մասնակցում է հստակ իշխանություններին ընտրելով և ոչ այն պատճառով, որ ստիպում են և միայն պետական համակարգի աշխատողներ են:

Ցանկացած փոփոխություն իրենց համար վտանգ է, հարմարվել են, չեն ուզում փոփոխություն, և իրենք ավելի ակտիվ են, քան այն մարդը, ով հուսալքված է»,-նշեց սոցիոլոգը։

Նրա խոսքով՝ կաշառքը վճռորոշ դեր չի խաղում և մարդիկ ավելի շատ ձայն տալիս են տեղական հեղինակություններին, որոնց կարծիքն ավելի բարձր է. «10 հազար հոգու գումար են տալիս, միայն հազարն է գնում և ընտրում ասած մարդուն»: 

Ադիբեկյանը վերջում հավելեց, որ այսօրվա դրությամբ հանրապետությունում ամենաազդեցիկ դեմքերն են նախագահ Սերժ Սարգսյանը, վարչապետ Կարեն Կարապետյանը, «Բարգավաճ Հայաստան» կուսակցության նախագահ Գագիկ Ծառուկյանը. «Նրանք կտրուկ անցած են բոլորից, և այս քաղաքական զարգացումները կխարսխվեն նրանց ընտրարշավների վրա»։