Ձեր վստահելի աղբյուրը

«Ընտրողների ցուցակների հրապարակումը լուծում է  500-600 հազար անցյալում կեղծվող ստորագրությունների խնդիրը, ինչը նշանակում է , որ կես մլն ձայն կեղծելու հնարավորությունից ու ազատությունից մենք զրկել ենք իշխանությանը»,-լրագրողների հետ հանդիպմանը հայտարարեց ԱԿ խմբակցության ղեկավար, Կոնգրես-ՀԺԿ» դաշինքի համամասնական ցուցակով պատգամավորի թեկնածու Լևոն Զուրաբյանը:

Նա կարևորեց նաև 2000 տեղամասերից 1500-ում տեսախցիկների տեղադրումը, որը ծածկում է  ընտրողների 93 տոկոսը:

«Ըստ էության, սրանք  շատ քիչ են հնարավոր դարձնում, կարելի է  ասել, համարյա անհնար են դարձնում, տեղամասերում ընտրակեղծարարությունը, նկատի ունեմ ուրիշի փոխարեն քվեարկությունը»,-ասաց Զուրաբյանը:

Նրա խոսքով, վերահսկման նման մեխանիզմների ներդրումը բերել է մեկ այլ խնդրի. «Բարձրացել են ընտրակաշառքի դրույքաչափերը, քանի որ իշխանությունը հասկանում է, որ չունի վերջին ապաստանը՝ տեղամասում կեղծելը, հիմա հասկանում են, որ խնդրի լուծման միակ երաշխավորը ընտրակաշառքն է: Իսկ կաշառքի շուկան ռեակցիա է տալիս օրենքներին: Այդ շուկան բարգավաճում է»:

Իրեն հասած լուրերով, ամենամեծ ընտրակաշառքը բաժանում է ԴԱՀԿ նախկին ղեկավար Միհրան Պողոսյանը՝ 100 դոլար յուրաքանչյուր քվեի համար:

Ընդդիմադիր ուժի ներկայացուցիչը  մտավախություն  հայտնեց, որ ընտրողների 50-60 տոկոսը պատրաստ է ընտրություն կատարել կաշառքի դիմաց:

«Սա շատ ծանր բան է: Մենք պետք է բացատրենք հասարակությանը: Նրանք պետք է հասկանան, որ այդ քայլով իրենք իրենց երկրի ապագան եղծում են: Ես կոչ եմ անում մեր բնակչությանը, որ գիտակցված քվեարկություն անեն, հասկանան, որ չի կարելի ապականել երկիրը: Ընտրակաշառքի հարաբերությունների մեջ մտնող մարդը պետք է հասկանա, որ նախ և առաջ ապականում է  իր ընտանիքը»,-ասաց նա: