Ձեր վստահելի աղբյուրը

Հայաստանում ընտրողների 36 տոկոսը հետաքրքրված չէ ընտրություններով, 43 տոկոսը որոշում ունեն՝ ում են իրենց ձայնը տալու, իսկ 24 տոկոսը դեռ որոշում չունեն,-այսօր լրագրողների հետ հանդիպմանը հայտնեց սոցիոլոգ Ահարոն Ադիբեկյանն՝ ամփոփելով  սոցիոլոգիական նախնական հարցումներով ստացված տվյալները:

Ադիբեկյանի խոսքով, պայքարը գնալու է երկու մակարդակի վրա:

«Վերին մակարդակում Հանրապետականն ու ԲՀԿ-ն վիճարկելու են՝ ով կլինի ամենահզոր քաղաքական բլոկն ԱԺ-ում, սակայն նրանց խնդիրները տարբեր են: ՀՀԿ-ն պետք է պաշտպանի իր դիրքերը, ԲՀԿ-ն պետք է վերադարձնի իր փախուստի ենթարկված առնետներին: Նրանց կարգախոսը «50+1» ձայնն է,  նախ պետք է դուրս եկածներին հետ բերեն, դրա հետ մեկտեղ է ուրիշների էլ բերեն, որ դառնան մեծամասնություն»:

Նա նշեց, որ երկրորդ հարթակի վրա մասնակիցները բաժանվում են երկու մասի՝ հնաբնակներ, որոնք պետք է պաշտպանեն նախկինում զբաղեցրած իրենց դիրքերը,  դրա մեջ է մտնում ՀՅԴ-ն, ՀԱԿ-ը, «Հայկական վերածնունդի» վերածված ՕԵԿ-ը: Իսկ մյուս խմբերը  պետք է կարողանան նվաճեն իրենց դիրքերը:

«Օսկանյան-Հովհաննիսյան-Օհանյան դաշինքին անհրաժեշտ է 7%, որը լուրջ թիվ է, բայց օրինակ՝ Րաֆֆի Հովհաննիսյանի  անձնական վարկանիշը 8% է, «Ազատ դեմոկրատներ»-ի երկրորդ դեմքը Բագրատյանն է, ճանաչված, խարիզմատիկ դեմք է: Այստեղ մնում է «Ելքը», որոնք հույս ունեն իրենց համակիրներին հավաքագրել նոր քաղաքական ասպարեզ մտնող երիտասարդ ընտրողների միջոցով: Փաշինյանը հայտնի է որոշ շրջանակներում և նրանց շանսերն էլ, կարծես, հավասարվում են, և խնդիր է միայն ոնց պայքարեն, ինչ ռեսուրս ծախսել, իսկ ռեսուրսը գոնե շտաբ ունենալն է»,-ասաց նա:

Սոցիոլոգը կարևորեց չկողմնորոշված 24 տոկոսի խնդիրը. «Սրա մեջ 5,6 տոկոսը կարող է գնալ քվեարկության, եթե ժամանակը ների,  լավ եղանակը ազեցություն կարող է ունենալ 1,3 տոկոսի համար, լավ քարոզը կարող է ազդեցություն ունենալ 6 տոկոսի վրա, սրա մեջ մտնում են հիմնականում երիտասարդ ընտրողներն ու տան տնտեսուհիները: 1,3 տոկոսը կարող է գումարի դիմաց տալ իր ձայնը: Մենք հաշվել ենք և դրա միջին գինը կազմում է 20 հազար դրամ: 11,2 տոկոսն էլ ունեն խնդիրներ, և եթե թեկնածուներից ինչ-որ մեկը լուծի այդ խնդիրը, մեծ հաճույքով ձայնը կտան նրան»:

Ադիբեկյանը հավելեց, որ մարտի 10-ի շրջանակում հանրային կարծիքի երկրորդ չափումը կանեն և արդեն  հստակ ուրվագիծը մարտի 20-ին պարզ կլինի: