Ձեր վստահելի աղբյուրը

Ղարաբաղա-ադրբեջանական շփման գծում իրավիճակը վերահսկելի է: Այս մասին Panorama.am-ի թղթակցի հետ զրույցում ասաց Արցախի Հանրապետության նախագահի մամուլի խոսնակ Դավիթ Բաբայանը:

Նրա խոսքերով՝ ներթափանցման փորձը արտառոց երևույթ չէ, միշտ էլ  հակառակորդը դիմում է նման քայլերի և ստանում համապատասխան հակահարվածը՝ ունենալով կորուստներ:

«Ֆաշիստական, ագրեսիվ և ահաբեկչական  պետություն է Ադրբեջանը: Աշխարհում չկա մի նախադեպ, երբ այդպիսի ահաբեկչական և ֆաշիստական պետությունը նման քաղաքականություն վարի՝ անկախ նրանից, թե որ ժամանակահատվածում է այդ ֆաշիստական պետությունը գոյատևել: Եթե կա այդպիսի պետություն՝ Ադրբեջան, Իսլամանական ահաբեկչական պետություն, պետք է նման քաղաքականություն վարի»,- ասաց Դավիթ Բաբայանը:

Ինչ վերաբերում է այսպես կոչված «Խոջալուի ջարդերին», նա նշեց, որ նման օրերին հակառակորդ ավելի ակտիվ է լինում: «Նույն Խոջալուն, որը կազմակերպել է հենց ադրբեջանական կողմը իր ներքաղաքական «աթոռի» պայքարի շրջանակներում, փորձում են մեզ դարձնել հիմնական պատասխանատուն և անընդհատ այդ օրերին խախտում են զինադադարը: Այստեղ կա նաև ներքաղաքական մեկ այլ խնդիր. ալիևյան կլանն արդեն դե յուրե սեփականաշնորհել է իշխանությունը, բռնապետը նշանակում է իր կնոջը առաջին փոխնախագահ՝ այն էլ այն դեպքում, երբ անընդհատ շահարկում է, որ այդ կինն ավելի հզոր է: Հիմա բռնապետը, որպեսզի ցույց տա, որ իրեն ոչ թե կինն է ղեկավարում, այլ աշխարհակալ է, Լենկ Թեմուրի նման զորավար է, նման քայլերի դիմելու է»,- նշեց Դավիթ Բաբայանը:

Սակայն, ըստ ԱՀ նախագահի մամուլի խոսնակի, հայկական  կողմը միշտ աչալուրջ է, միշտ պատրաստ է հակահարված տալ: «Այլ տարբերակ չկա: Ագրեսորը, հանցագործը ոչ մի բանից չի քաշվում, հոգու տառապանք չի զգում, նրանց խիղճը չի տանջում, նրանք միայն կարող են վախենալ ինչ-որ երևույթից: Հետևաբար, միշտ պետք է լինենք ուժեղ և հակահարված տանք ցանկացած դեպքում»,- ասաց Դավիթ Բաբայանը: