Ձեր վստահելի աղբյուրը

ՀՀ ԱՆ «Դատապարտյալների հիվանդանոց» քրեակատարողական հիմնարկի կալանավորված անձ Արթուր Սարգսյանի առողջական վիճակի կապակցությամբ Քրեակատարողական ծառայությունը տեղեկացնում է, որ ինչպես նշվել է, փետրվարի 10-ից հացադուլի մեջ գտնվող Ա. Սարգսյանը հրաժարվում է որևէ տեսակի բժշկական օգնություն ստանալուց:

Նշում են նաև, որ վերջինս արյունային փսխումներ չի ունեցել, ձայնը լսելի է, խոսքը` հստակ և ունի սթափ գիտակցություն:

«Քրեակատարողական հիմնարկի համապատասխան մասնագետները ևս բազմիցս ներկայացրել են հացադուլի և բուժումից հրաժարվելու հետ կապված հնարավոր հետևանքների նկարագիրը, սակայն Ա. Սարգսյանն անդրդվելի է:

Հավելենք, որ Ա. Սարգսյանը գտնվում է «Դատապարտյալների հիվանդանոց» քրեակատարողական հիմնարկի բուժանձնակազմի շուրջօրյա դինամիկ հսկողության ներքո»,- նշված է ԱՆ քրեակատարողական վարչություն հանրային կապերի բաժնի հայտարարության մեջ: 

Հիշեցնենք՝  ըստ պաշտոնական հաղորդագրությունների, Արթուր Սարգսյանը ճեղքել էր ոստիկանական պատնեշը և սնունդ հասցրել ոստիկանության ՊՊԾ գունդը գրաված «Սասնա ծռերի» անդամներին։ Նա մեղադրվում է պատանդներ պահելուն և զենք-զինամթերք տեղափոխելուն ու պահելուն օժանդակելու մեջ: Արթուր Սարգսյանը ձերբակալվել էր հուլիսի 31-ից, դեկտեմբերի 31-ին կալանքից ազատվել էր: Սակայն փետրվարի 9-ին Ա. Սարգսյանը կրկին կալանավորվել է: Նրա փաստաբան Տիգրան Եգորյանն ասել է, որ ՀՔԾ-ն Ա. Սարգսյանի  ձերբակալման հիմք է համարել այն, որ նա  փետրվարի 3-ին չի ներկայացել քննչական մարմնին: Մինչդեռ, փաստաբանի խոսքով, նախապես քննիչին տեղյակ են պահել չներկայանալու մասին և խնդրել փոխել հանդիպման օրը: Նա հացադուլ էր հայտարարել: