Ձեր վստահելի աղբյուրը

Հայաստանում ԵՄ պատվիրակության քաղաքական, տնտեսական, մամուլի և տեղեկատվության բաժինը տարածել է Եվրոպական խորհրդի նախագահ Դոնալդ Տուսկի հայտարարությունը Հայաստանի Հանրապետության նախագահ Սերժ Սարգսյանի հետ հանդիպումից հետո:
Հայտարարության մեջ ասված է. 

«Ուրախ եմ այսօր ողջունել Նախագահ Սարգսյանին Բրյուսելում: 

Հայաստանը հանդիսանում է Եվրոպական միության կարևոր գործընկերը,  որի  անկախությանը, ինքնիշխանությանն ու տարածքային ամբողջականությանը մենք աջակցում ենք:  

Ուրախ եմ այսօր հայտարարել, ԵՄ-Հայաստան Համապարփակ և ընդլայնված գործընկերության համաձայնագիրի շուրջ բանակցությունների ավարտը:

Նոր համաձայնագիրը  կընդլայնի ԵՄ-Հայաստան  հարաբերությունների շրջանակը՝ հաշվի առնելով համաշխարհային, քաղաքական և տնտեսական նոր հետաքրքրությունները, որոնք մենք կիսում ենք, և նաև առկա մարտահրավերները, որոնց ցանկանում ենք  միասնաբար դիմակայել:

Մենք ձգտում ենք ամրապնդել համագործակցությունը էներգետիկայի, տրանսպորտի, և բնապահպանության ոլորտներում, ստեղծել առևտրի և ներդրումների նոր հնարավորություններ և, նաև ընդլայնել շարժունությունը՝ ի շահ մեր քաղաքացիների: 

Այսօր քննարկեցինք մեր ընդհանուր արժեքները, ներառյալ ժողովրդավարության, մարդու իրավունքների և օրենքի գերակայության նկատմամբ հանձնառությունը, որոնք հանդիսանում են նոր Համաձայնագրի և մեր հետագա համագործակցության հիմքը:

ԵՄ-ն արդեն հանդիսանում է Հայաստանի առաջին առևտրային գործընկերը, առաջին միջազգային դոնորն ու բարեփոխումների ամենահզոր աջակիցը: Մեր նպատակն է հետագա տարիների ընթացքում ավելի ընդլայնել առկա հարաբերությունները, և քաջալերում ենք  Հայաստանին շարունակել բարեփուխումները տնտեսական զարգացման, բիզնես միջավայրի, դատական համակարգի և մարդու իրավունքների, կոռուպցիայի դեմ պայքարի ինչպես նաև ազատ և արդար ընտրություններն ապահովող միջացառումների ուղղությամբ:    

Քննարկեցինք նաև Լեռնային Ղարաբաղի շուրջ հակամարտության խաղաղ կարգավորման հարցը: Ստատուս-քվոյի պահպանումն անբեկանելի է: Հակամարտությանը անհրաժեշտ է շուտափույթ՝  միջազգային իրավունքի նորմերին համահունչ քաղաքական  հանգուցալուծում: Այն չունի ռազմական լուծում: ԵՄ-ն շարունակում է լիարժեք աջակցությունը ԵԱՀԿ Մինսկի խմբի համանախագահների միջնորդության ջանքերին և նրանց կողմից ներկայացվող առաջարկներին:

Պարո՛ն Նախագահ,
Անչափ շնորհակալ եմ Բրյուսել կատարած  այցի, Ձեր բոլոր ջանքերի և մեր համագործակցության համար»:

Հիշեցնենք, որ աշխատանքային այցով Բելգիայի Թագավորությունում գտնվող Նախագահ Սերժ Սարգսյանն այսօր առանձնազրույց է ունեցել Եվրոպական խորհրդի նախագահ Դոնալդ Տուսկի հետ: Բանակցությունները շարունակվել են ԵԽ նախագահի անունից ի պատիվ աշխատանքային այցով Բելգիայի Թագավորությունում գտնվող Հայաստանի Հանրապետության Նախագահի տրված աշխատանքային ճաշի շուրջ: ՀՀ Նախագահ Սերժ Սարգսյանը և Եվրոպական խորհրդի նախագահ Դոնալդ Տուսկը հանդիպման արդյունքներն ամփոփել են զանգվածային լրատվամիջոցների ներկայացուցիչների առջև համատեղ հայտարարություններով: