Ձեր վստահելի աղբյուրը

«Փետրվարի 24-ի լույս 25 գիշերը տեղի են ունեցել դիվերսիոն գործողությունները, որոնք կարող էին ծանր հետևանքներ ունենալ: Փառք մեր զինվորներին և հրամանատարներին, որ զգոն են եղել, առանց կորուստների հետ են մղել գրոհը՝ ծանր կորուստներ պատճառելով հակառակորդին»,- Ազգային ժողովի նիստում ասաց ՀԱԿ խմբակցության  ղեկավար Լևոն Զուրաբյանը:

Նրա խոսքով՝ ակնհայտ է, որ տեղի է ունենում ռազմական գործողությունների էսկալյացիա:

«Սա իրականում ապրիլյան պատերազմի  շարունակությունն է,  նախերգանքը նոր պատերազմական գործողությունների համար: Վերջին զարգացումները ցույց են տալիս, որ իրավիճակը նորից սկսում է  դուրս գալ վերահսկողությունից, մենք աստիճանաբար  սլանում ենք դեպի պատերազմական էսկալյացիա: Եթե  շատ արագ չձեռնարկվեն ադեկվատ միջոցառումներ ռազմաճակատի գծի ամրապնդման, դիվանագիտական ջանքերի ակտիվացման ուղղությամբ, մենք կանգնած ենք կործանարար հետևանքների, հեռանկարների առաջ»,- ասաց ընդդիմադիր պատգամավորը:

Լ. Զուրաբյանն առաջարկեց ԱԺ նախագահ Գալուստ Սահակյանին շտապ հրավիրել ԱԺ փակ նիստ, որտեղ համակողմանիորեն կքննարկվի ստեղծված պայթյունավտանգ իրավիճակը, պետության ռազմավարությունն ազգային անվտանգությանը սպառնացող այդ ճգնաժամի հաղթահարման ուղղությամբ:

ԱԺ նախագահ Գալուստ Սահակյանն  ասաց. «Պետք է հասկանանք,  դատենք, թե ինչ ենք անելու փակ  նիստում, երբ ամեն գործողություն, որը կատարվում է, ողջ հասարակությունը գիտի: Համենայնդեպս, կմտածեմ»: