Ձեր վստահելի աղբյուրը

«Ադրբեջանը, վերջին տարիներին մարդու իրավունքները խախտելու առումով, անընդհատ աննախադեպ քայլեր է կատարում, որոնք հարուցում են միջազգային իրավապաշտպանների զարմանքը: Այդ խախտումները վերաբերում են նաև ներքին  կյանքին»,- «Ադրբեջանի որոշումը ԵԽ պատգամավորների նկատմամբ քրեական գործ հարուցելու վերաբերյալ. որո՞նք պետք է լինեն Հայաստանի հակաքայլերը» թեմայով Երևանում կազմակերպված քննարկման ժամանակ ասաաց   Արցախի Մարդու իրավունքների պաշտպան Ռուբեն Մելիքյանը:

«Ադրբեջանն անցել է կարմիր գիծը, ի նկատի ունեմ՝  նոր մարտահրավեր է ամեն անգամ ներկայացնում: Այս անգամ այդ մարտահրավերն ուղղված է Եվրոպայի քաղաքական  հանրույթին»,-այժմյան իրերի վիճակը ներկայացրեց Ռուբեն Մելիքյանը:

Թվարկելով Արցախի ՄԻՊ գրասենյակի ձեռնարկելիք քայլերը, օմբուդսմենն ասաց, փորձել ու փորձելու են միջազգային հանրությանը տրամադրել հնարավորինս մատչելի ինֆորմացիա, գործընկերների մոտ ստեղծել մոտիվացիա՝ Արցախի խնդրին ու Արցախում ապրող մարդկանց իրավունքների հիմնախնդիրներին ավել մեծ ուշադրություն դարձնելու համար:

«Դա կլինի այցելությունների, գիտական գործունեության, թե այլ ձևով: Ադրբեջանի նման որոշումը մեզ հնարավորություն է  տալիս Արցախը միջազգային ուշադրության առարկա դարձնել, և մենք փորձելու ենք հնարավորինս  օգտվել դրանից»,-ասաց Ռ. Մելիքյանը:

Քննարկման մասնակիցներից Հայաստանի Փաստաբանների պալատի նախագահ Արա Զոհրաբյանն ընդգծեց, որ Արցախ այցելած ու Արդրբեջանին արտահանձնված Ալեքսեյ Լապշինը Բաքվի համար դառնալու է տրոյական ձի:

«Ի վերջո, նրանք հենց Լապշինով ձախողելու են»,-ասաց Զոհրաբյանը:

Նա այն համոզման է, որ միջազգային հանրության մոտ Ադրբեջանը ագրեսորի կեցվածք ունի. «Հետապնդում է մարդկանց, ովքեր ունեն քաղաքական համոզմունքներ»:

Փաստաբանների պալատի նախագահ Արա Զոհրաբյանն այսօր չցանկացավ ԵԽ պատգամավորների նկատմամաբ հարուցվածք քրեական գործի մասին փակագծեր բացել, քննարկումներն ընթացքի մեջ են:

«Իրավական հիմքերի մասին կխոսեմ, ինչի՞ հետ ենք մենք առնչվում կոնկրետ ԵԽ երեք պատգամավորների հետապնդման փորձի մասով: Առաջին. մենք  ունենք եվրոպական կոնվենցիա, որը երաշխավորում է օրենքի հիման վրա պատժի սահմանումը: Այսինքն, պետությունները միայն օրենքով սահմանված գործողությունների համար կարող են սահմանել պատիժ: Տվյալ դեպքում, Ադրբեջանի Հանրապետությունը երեք պատգամավորների մեղադրանքի հիմքում դնում է այն, իբր նրանք անցել են ադրբեջանական սահմանը: Մինչդեռ Ադրբեջանի քրեական օրենսգրքի 318 հոդվածը նշում է  Ադբրբեջանի կողմից պահպանվող պետական սահմանի մասին»,-մանրամասնեց Զոհրաբյանը:

Նա ընդգծեց, անվիճելի է, որ Արցախի սահմանը որևէ կերպ իրենց կողմից չի վերահսկվում:

«Այսինքն, սա խոսում է այն մասին, որ իրենք այդ հոդվածը չեն կարող կիրառել, քանի որ ինչի վրա հիմվում են, ոչ իրավաչափ է»,-պարզաբանեց մասնագետը:

Զոհրաբյանը հիշեցրեց, որ նույն կոնվենցիան սահմանում է խտրականության արգելման մասին:

«Որևէ մեկին չի կարելի հետապնդել քաղաքական կամ այլ հայացքների համար: Տվյալ դեպքում պատգամավորները, գալով Արցախի Հանրապետության կարևոր միջոցառմանը մասնակցելու, արտահայտում են իրենց հայացքները: Տվյալ դեպքում միայն այդ միջոցառմանը մասնակցելու համար քրեական հետապնդում սկսելը խտրականության արգելման սկզբունքի խախտում է, սա ևս Ադրբեջանի շանսերը հավասերցնում է  զրոյի»,-ասաց նա:

Զոհրաբյանը հիշեցրեց, որ Ինտերպոլի կանոնադրության համաձայն, արգելվում է համագործակցություն որևէ երկրի հետ, եթե կա քաղաքական նպատակ:

«Միայն այս փաստը բավարար է, որ Ինտերպոլը նրանց չօժանդակի»,-ասաց Զոհրաբյանը: