Ձեր վստահելի աղբյուրը

Ազգային ժողովում քննարկվում է «Ճարտարապետական գործունեության մասին» և կից ներկայացված օրենքների նախագծերի փաթեթն առաջին ընթերցմամբ ընդունելի մասին հարցը:

Հիմնական զեկուցող  կառավարության առընթեր քաղաքաշինության պետական կոմիտեի նախագահ Նարեկ Սարգսյանն ասաց, որ այս օրենքով առաջարկվում է ստեղծել Ճարտարապետների պալատ. «Ճարտարապետների միությունը վերակազմակերպվում է որպես պալատի, ձեռք է բերում մի շարք ֆունկցիաներ, որոնք մինչ այդ չի ունեցել, բայց մասնագետները մշտապես առաջարկել են: Առաջարկները բխում են նաև  համաշխարահային պրակտիկայից: Բոլոր զարգացած երկրներում ճարտարապետների գործունեությունը կարգավորվում է  նմանատիպ օրենքով: Այն սկզբունքները, որոնք այստեղ դրված են, միջազգային  պրակտիկայից են վերցված, այսինքն կկարողանանք  համահունչ քայլել, կարևոր է մասնագիտական գործունեությունը կազմակերպելու համար»:

Ն. Սարգսյանի ներկայացմամբ, պալատին տրվում է ճարտարապետներին  արտոնագրելու լիազորություն,  միայն արտոնագրված ճարտարապետներն իրավունք ունեն զբաղվել մասնագիտական գործունեությամբ, մնացածը, ովքեր պայմաններին չեն բավարարում, պետք է ունենան համապատասխան ստաժ և անցնեն համապատասխան քննություն:

Օրենքով նաև համապատասխան պատժամիջոցներ են սահմանվում տարբեր կարգի խախտումների, այդ թվում նաև էթիկայի, համար:

Պատգամավոր Խոսրով Հարությունյանը  նշեց, որ այսօր հաճախ խոսվում է  ՏԻՄ գործունեության մասին, որակումներ, գնահատականներ տալիս՝ համոզված լինելով, որ շատ հարցերի պատասխանատուն գլխավոր ճարտարապետն է, բայց մինչդեռ իրականացնող, իրական որոշում կայացնողը հաճախ ինքը չէ:  

«Ո՞րն է այն լուծումը,  որ քաղաքի ճարտարապետին կառանձնացնի ՏԻՄ համակարգում իր ֆունկցիաներով: Համանման պրոբլեմ ունենք մարզերում: Ամեն մի գյուղ չի՞ կարող ճարտարապետ ունենալ, մինչդեռ  ճարտարապետական դիմագիծ պետք է ունենա: Որո՞նք ենք այդ լուծումներրը»,- հարցեր պատգամավորը:

Նարեկ Սարգսյանը պատասխանեց, որ Խ. Հարությունյանն այս հարցով կպնում է ամենակարևոր ներվին: Նրա խոսքով, այս օրենքն ամբողջական պատասխանատվությունը դնում է ճարտարապետի վրա:  Ն. Սարգսյանն ասաց, որ այս նախագծով լուծվում է կադրերի խնդիրը, նաև մարզերում:

Պատգամավոր Գագիկ Ջհանգիրյանը հետաքրքրվեց, թե արդյո՞ք պատրասվում են նաև շինարարների պալատ ստեղծել, նրան թույլ տալ լիցենզավորել  շինարական գործունեություն իրականացնողնին, ինչպե՞ս կլինի՝ ճարտարապետը լիցենզավորված լինի, բուն շինարարություն կատարողը՝ ոչ:

Ն. Սարգսյանն ասաց, որ շինարարների մասով որևէ պրակտիկա չգիտեն, մինչդեռ ճարտարապետների մասով ամբողջ աշխահում գործում է այս մեխանիզմը: