Ձեր վստահելի աղբյուրը

«Եվրամիության հետ Հայաստանի համագործակցությունն առանցքային նշանակություն ունի և արտաքին քաղաքականության տեսանկյունից, և այն քայլում է կողք-կողքի  Հայաստանի ներքին կյանքում իրականացվող բարեփոխումների հետ»,-Ազգային ժողովում հայտարարությունների ժամին ունեցած ելույթում ասաց պատգամավոր Սամվել Ֆարմանյանը:

Նա հիշեցրեց, որ  նախօրեին Բրյուսելում ՀՀ նախագահի կողմից Եվրոպական խորհրդի նախագահ Դոնալդ Տուսկի հետ հանդիպմանը հայտարարվեց ՀՀ-ԵՄ միջև բանակցային գործընթացի ավարտի մասին, Համապարփակ և ընդլայնված գործընկերության համաձայնագիրն արդեն  պատրաստ է ստորագրման:

«Դատելով տարատեսակ ակնարկներից՝ այն կստորագրվի այս տարվա ընթացքում»,- հավելեց Ս.  Ֆարմանյանը:

Նրա կարծիքով, երեկվա հայտարարությունը նաև լավագույն պատասխանն էր բոլոր այն քննադատողներին, հոռետեսներին, ովքեր ընդամենը մի քանի տարի առաջ ավետում էին կամ գուժում ԵՄ-ի հետ համագործակցության ավարտի մասին:

«Պետք է նաև արձանագրել, որ բանակցված փաստաթուղթն առհավատչյան է ոչ միայն Հայաստանի իշխանությունների քաղաքական հստակ կամքի, այլ նաև Եվրամիության կողմից Արևելյան գործընկերության քաղաքականության վերանայման՝ այդ քաղաքականությունն առանձին երկրների առանձնահատկություններին  համապատասխանեցման միջոցով»,- ասաց Ս. Ֆարմանյանը: