Ձեր վստահելի աղբյուրը

Ազգային ժողովի նիստը մեկնարկեց մեկ րոպե լռությամբ՝ հարգելով Մարտի 1-ի զոհերի հիշատակը:

2008 թվականի մարտի 1-ին Երևանում տեղի ունեցած ողբերգական իրադարձությունների ժամանակ զոհվել էր 10 մարդ: Այսօր տարբեր քաղաքական ուժերի ներկայացուցիչներ, քաղաքացիներ ծաղիկներ են դնում Մյասնիկյանի արձանի մոտ՝ հարգանքի տուրք մատուցելով Մարտի 1-ի զոհերի հիշատակին: Տարբեր քաղաքական ուժեր նաև հանդես են գալիս հայտարարություններով, կազմակերպում երթ, հանրահավաք:

«Օհանյանի–Րաֆֆի–Օսկանյան» դաշինքի հայտարարությունը Մարտի 1–ի տարելիցի կապակցությամբ.
«Այսօր լրանում է 2008թ. մարտի 1–ին տեղի ունեցած ողբերգական  իրադարձությունների 9–րդ տարելիցը։ Մենք ունեցանք 10 զոհ և բազմաթիվ  վիրավորներ։ Դաշինքը ցավակցում է զոհերի հարազատներին ու մտերիմներին։
Մենք համոզված ենք, որ Մարտի 1–ի իրադարձությունները պայմանավորված էին
նորանկախ Հայաստանում տարիների ընթացքում ձևավորված և խոր արմատներ գցած  արատավոր երևույթներով, մասնավորապես ընտրական համակարգի չկայացածությամբ։
Մարտի 1–ին պետք է տրվի քաղաքական գնահատական, և իրավական առումով պետք է  ներկայացնել հանրությանը հուզող բոլոր հարցերի պատասխանները։ Պետությունը պարտավոր է զոհերի հարազատներին տալ համապատասխան  փոխհատուցում։ Մարտի 1–ը ողբերգություն է, որից պետք է դասեր քաղել,  հետևություններ անել և այդ օրը հռչակել հասարակական համերաշխության ու  հիշատակի օր։
Ողբերգության կրկնության բացառումը հնարավոր է միայն մրցակցային և ազատ  քաղաքական ու տնտեսական հարաբերությունների հաստատման, ինչպես նաև ընտրական ինստիտուտի ժողովրդավարացման դեպքում»։