Ձեր վստահելի աղբյուրը

Այսօր խորհրդարանում կառավարության հետ հարց ու պատասխանի ժամանակ ՀԱԿ խմբակցության պատգամավոր Նիկոլ Փաշինյանը հիշեցրեց վարչապետի այն հայտարարությունը, որ այսուհետ ամեն մարդ ցանկացած ապրանք կարող է ներմուծել Հայաստան, իսկ խոչընդոտի դեպքում կարող են զանգել իրեն:

Մինչդեռ, ըստ պատգամավորի, ընկերություններից մեկը շուրջ մեկ ամիս է չի կարողանում մաքսազերծել 460 տոննա կերոսին: «Այս թեմայի մասին խոսել եմ ՊԵԿ-ի ղեկավարության, Սուրեն Կարայանի  և մի շարք այլ մարմինների մասնագետների հետ: Ինձ համար միանշանակ է՝ խոչընդոտ է հարուցվում, իսկ դե յուրե, պարոն Կարայանը երկու անգամ հաստատել է, որ այդ ապրանքը ներկրելու որևէ խոչընդոտ չկա»,- նշեց Փաշինյանը՝ հավելելով, որ երկու շաբաթ առաջ էլ դրա վերաբերյալ հոդված է գրել, որը վերնագրված է՝ «Բաց հորդոր վարչապետ Կարեն Կարապետյանին»:

«Ինչ հայտարարել եմ, տեր եմ այդ հայտարարություններին: Ավելին, ձեր հորդորը, պարոն Փաշինյան, տեղ է հասել, և այս պահին օգնականս այդ հարցով զբաղվում է»,- արձագանքեց վարչապետ Կարեն Կարապետյանը:

Վարչապետը նկատեց, որ Փաշինյանի մատնանշած ընկերության գործունեության հետ կապված խնդիր կա, քանի որ ներկրվող ապրանքը ոչ թե կերոսին է, այլ վառարանային վառելիք:

«Այդպիսի սպառում Հայաստանում, կասկածում ենք, որ ունենք: Ունենք կասկած, որ վառարանային վառելիքը հետո գնում, կերոսինի հետ խառնվում է, և մենք շուկայում ունենում ենք անորակ նավթամթերք: Տնտեսական զարգացման նախարարության տեսչական մարմինը երկար ժամանակ իր գործառույթները լավ չի կատարել: Մենք մոտ օրերս հանդիպել ենք մեկ այլ մատակարարի հետ, որը նույնպես  բարձրացրել է խնդիր, որ առաջանում է ԵՏՄ-ից ու Իրանից ներմուծման ժամանակ: Այդ իսկ պատճառով այս պահին այդ հետազոտություններն ենք անում, որ շուկա չմտնի մի ապրանք, որը հետո կհայտնվի մեկ այլ տեղ: Բայց այն, որ քաշքշուկ կա այս ապրանքի ներկրման հետ, ճիշտ եք», - ասաց Կարեն Կարապետյանը: 

Նիկոլ Փաշինյանը պնդեց, որ ներկրվող ապրանքը կերոսին է, ավելին՝  ունի փաստաթուղթ, մասնագետներն էլ հաստատել են, որ դա կերոսին է: «Վառարանային վառելիքն էլ է կերոսին», - հակադարձեց Կարեն Կարապետյանը:

«Եթե նույնիսկ վառարանային վառելիք է, ապա ՀՀ օրենսդրությամբ դա ներկրելու որևէ արգելք չկա: Ինչ վերաբերում է այդ տրամաբանությանը, ապա սա նույնն է, որ ասենք՝ դանակի ներկրումն արգելեն, թե մարդիկ կարող են դանակով մարդ սպանել: Այն, ինչ դուք հիմա ասում եք, այս հարցի բոլոր մանրամասներին ծանոթացել եմ, և իմ ասածները հիմնված են կառավարության պետական մարմինների ներկայացուցիչների հետ իմ զրույցների վրա: Եվ թույլ տվեք արձանագրել, որ այս հայտարարությունը՝  յուրաքանչյուրը կարող է ցանկացած ապրանք ներմուծել Հայաստան, այլևս չի գործում»,- նշեց Նիկոլ Փաշինյանը: 

Կարեն Կարապետյանը համաձայնեց, որ կա իրականում խաղի կանոնների խնդիր, որը պետք է կանոնակարգվի, որպեսզի քաշքշուկ չլինի:

«Ապրիլյան պատերազմի ժամանակ մենք ունեինք բազմաթիվ դեպքեր, երբ մեր ռազմական տեխնիկան չէր աշխատում այդ պատճառով: Դուք ճիշտ եք, այդ խոչընդոտը չպետք է լինի: Ես ընդունում եմ: Բայց ես նաև պնդում եմ, որ սահմանի վրա մենք որևէ ապրանքի ներկրման սահմանափակում չունենք»,- հայտարարեց վարչապետը: