Ձեր վստահելի աղբյուրը

Թիվ 1 ընտրատարածքում «Ելք» դաշինքը տարածքային ցուցակում 11 թեկնածու է ընդգրկել: Նրանցից տասը դաշինքի մաս կազմող «Քաղաքացիական պայմանագիր», «Լուսավոր Հայաստան», «Հանրապետություն» կուսակցությունների ներկայացուցիչներ են, մեկը՝ Հայկ Մարգարյանը անկուսակցական է: Նա կենսաթոշակառու է: Թեկնածուներից 3-ը չեն աշխատում: Ցուցակում ընդգրկված թեկնածուներից 3-ը կանայք են:

Երևանի Ավան և Նոր Նորք վարչական շրջաններն ընդգրկող ընտրատարածքում «Ելք»-ի՝ հանրությանն առավել հայտնի թեկնածուներն են Մանե Թանդիլյանը՝  «Լուսավոր Հայաստան»   կուսակցությունից, Զարուհի Բաթոյանը՝ «Քաղաքացիական պայմանագիր» կուսակցությունից:

«Ազատ դեմոկրատներ»-ից այդ ընտրատարածքում կպայքարեն 6 թեկնածուներ, որոնցից առավել հայտնի է «Ժառանգության» նախկին անդամ, քաղաքագետ Ստոյպա Սաֆարյանը: Վեց թեկնածուներից երկուսը կանայք են: Նրանցից մեկը կուսակցության նախագահ, ԱԺ պատգամավոր Խաչատուր  Քոքոբելյանի օգնականն է:

«Հայկական վերածնունդ»-ի տարածքային ցուցակում ներառված է 13 քաղաքացի: Այս ընտրատարածքում են առաջադրված կուսակցության փոխնախագահ, «Օրինաց երկիր» խմբակցության քարտուղար Մհեր Շահգելդյանը, կուսակցության մամուլի խոսնակ Էդգար Առաքելյանը: 13 թեկնածուներից երեքը չեն աշխատում, չորսը կանայք են:

«Ծառուկյան» կուսակցությունների դաշինքի տարածքային ցուցակում ևս 13 թեկնածու կա, նրանցից ութը ԲՀԿ-ական են, մեկը՝ «Հայազն» կուսակցությունից, մեկը՝ «Առաքելություն»-ից, մյուսները՝ անկուսակցական: Նրանք բոլորն էլ աշխատում են: Թեկնածուներից 4-ն իգական սեռի ներկայացուցիչներ են:
Այստեղ պայքարելու են «Առաքելություն» կուսակցության նախագահ Մանուկ Սուքիասյանը, «Հայազն»-ից՝ Արտավազդ Սարգսյանը, ԲՀԿ-ական Արտյոմ Ծառուկյանը Վերահսկիչ պալատի առաջատար մասնագետ է, Գևորգ Պետրոսյանը ԵՊՀ դասախոս է:

Կոնգրես–ՀԺԿ դաշինքն այս ընտրատարածքում առաջադրել է 5 թեկնածու: Նրանցից միայն  մեկն է աշխատում, երկուսը կանայք են:
Այս ընտրատարածքում պայքարելու են Վլադիմիր Կարապետյանը, ով նախկին ԱԳ նախարար Վարդան Օսկանյանի մամուլի քարտուղարն էր, «Անտարես» հրատարակչության տնօրեն Արմեն Մարտիրոսյանը:

ՀՀԿ-ից այս ընտրատարածքում առաջադրված է 12 թեկնածու: Նրանցից չորսն անկուսակցական են, թեկնածուներից 3-ը կանայք են:

Մամուլն արդեն բազմիցս գրել է այս ընտրատարածքում առաջադրված թեկնածուներից «Քեթրին» ՀԿ-ի նախագահ Միհրան Պողոսյանի մասին, ով ԴԱՀԿ նախկին ղեկավարն էր, և օֆշորի հետ կապված սկանդալային հրապարակումներից հետո հեռացավ պաշտոնից: Նույն ՀԿ-ի տնօրեն Սրապիոն Մխիթարյանը ևս առաջադրված է այս ընտրատարածքում:
Այստեղ առաջադրված է նաև գործող պատգամավոր Ռոբերտ Սարգսյանը, ով քաղաքապետ Տարոն Մարգարյանի կնոջ եղբայրն է:

Թեկնածուների թվում մի քանի դպրոցների տնօրեններ էլ կան՝ թիվ 128 հիմնական դպրոցի, թիվ 198 ավագ դպրոցի, թիվ 44 հիմնական դպրոցի:

Կոմկուսն այս ընտրատարածքում առաջադրել է 13 թեկնածու: Նրանցից երկուսն անկուսակցական են, չորսը՝ իգական սեռի ներկայացուցիչներ: Ցուցակում ընդգրկվածներից շատերը թոշակառուներ են, մի քանիսը՝ շրջկոմների քարտուղարներ:
Հանրությանն առավել հայտնի գործիչներից է կենսաբան Սիլվա Ադամյանը, ով հաճախ է ահազանգում բնապահպանական խնդիրների մասին:

Օհանյան-Րաֆֆի-Օսկանյան դաշինքի տարածքային ցուցակում 9 թեկնածու կա, նրանցից 8-ն աշխատանք չունեն: Միակ աշխատանք ունեցողը գործող պատգամավոր Հայկ Խաչատրյանն է «Համախմբում» կուսակցությունից: Թեկնածուներից չորսը կանայք են:
Թեկնածուներից միայն մեկն է անկուսակցական, մյուսները՝ «Համախմբում» կուսակցության անդամներ են:

Թիվ մեկ ընտրատարածքում ՀՅԴ-ն առաջադրել է տասը թեկնածու, նրանցից երկուսն անկուսակցական են: Նրանցից երեքն իգական սեռի ներկայացուցիչներ են: Դաշնակցությունից այստեղ պայքարելու են Սերգեյ Լոքյանը, ով տարածքային կառավարման նախարար Դավիթ Լոքյանի որդին է, Արտուշ Շահբազյանը, ով մամլո դիվանի պատասխանատուն է, Ռուզաննա Առաքելյանը, ով Հանրային ռադիոյի հասարակական հաղորդումների բաժնի ղեկավարն է: