Ձեր վստահելի աղբյուրը

Մարտի 9-10-ը Լոնդոնում տեղի կունենա հայ-բրիտանական ՏՏ ընկերությունների միջև բիզնես հանդիպումներ, որին կմասնակցեն հայկական 17 ընկերություններ: Այս մասին այսօր լրագրողների հետ հանդիպման ժամանակ ասաց «Բի Էս Սի» բիզնեսի աջակցման կենտրոնի տնօրեն Սամվել Գևորգյանը:

Նրա խոսքերով՝ բոլոր ընկերությունները զգալի փորձառություն ունեն ինչպես տեղական, այնպես էլ միջազգային շուկաներում: Նրանք կարող են բարձրորակ ՏՏ ծառայություններ ու լուծումներ առաջարկել բրիտանական շուկայի համար և երկարատև հուսալի գործընկերություն հաստատել այն ավելի քան 70 ընկերությունների հետ,  որոնք մասնակցելու են լոնդոնյան միջոցառմանը:

Սամվել Գևորգյանը հայտնեց, որ հայկական ՏՏ ընկերությունների կողմից առաջարկվող ծառայություններն ընդգրում են գրեթե բոլոր ՏՏ ոլորտները՝ վիրտուալ իրականությունից, եռաչափ անիմացիայից ու կրթությունից մինչև պատրաստի համակարգչային բիզնես ծրագրեր, աութսորսինգ և բջջային հավելվածներ:

Մեծ Բրիտանիայի և Հյուսիսային Իռլանդիայի Միացյալ Թագավորության արտակարգ և լիազոր դեսպան Ջուդիթ Ֆարնուորթն էլ նշեց, որ Երևանում բրիտանական  դեսպանատան գերակայություններից մեկը Միացյալ Թագավորության և Հայաստանի միջև տնտեսական, առևտրային կապերի ավելի սերտ և փոխշահեկան հարաբերությունների խթանումն է: «Հայաստանի բարձրաստիճան պաշտոնյաների, գործարարների հետ քննարկումներից գիտեմ, որ նույն հավակնությունը կա նաև հայկական կողմում»,- ասաց դեսպանը:

Նրա խոսքերով՝ երբ դեսպանատան թիմը սկսել է խորությամբ ուսումնասիրել ՀՀ տնտեսության տարբեր ոլորտները, առանձնացրել են տեղեկատվական և հաղորդակցային տեխնոլոգիաների ոլորտը՝ որպես խոստումնալից  ոլորտ, որն արագ տեմպերով աճում է և Հայաստանի տնտեսության մեջ ունի մեծ մասնաբաժին:

«Գիտահետազոտական հարուստ և աշխարհի լավագույն ցուցանիշներին չզիջող ավանդույթները, հմուտ և տաղանդավոր աշխատուժի առկայությունը, ինչպես նաև կառավարության լուրջ օժանդակությունը նպաստել են, որպեսզի Հայաստանը բարձր տեխնոլոգիաների հանգույց դառնա՝ ներգրավելով բարձր տեխնոլոգիաների ոլորտի համաշխարհային բազմաթիվ ձեռնարկությունների: Այս ամենի արդյունքում Հայաստանը համապատասխան գործընկեր է դառնում Միացյալ թագավորության համար, որը նույնպես կայացած դիրք է զբաղեցնում ՏՀՏ ոլորտում»,- ասաց Ջուդիթ Ֆարնուորթը:

Դեսպանը նաև նշեց, որ վերջին մի քանի ամիսներին դեսպանության թիմը գործընկերության շրջանակում աշխատելով Բիզնեսի աջակցման կենտրոնի հետ, մշակել է հայ-բրիտանական ՏՏ նախաձեռնությունների ծրագիրը, որն ուղղված է բրիտանական և հայկական ՏՏ ընկերությունների միջև երկարաժամկետ  հարաբերությունների  ձևավորմանը: Ծրագրի հիմնական նպատակն է Միացյալ Թագավորության շուկաներում ավելի ճանաչելի դարձնել Հայաստանի բարձր տեխնոլոգիական ոլորտը և գտնել համագործակցության կոնկրետ հնարավորություններ:

ՀՀ տրանսպորտի, կապի և տեղեկատվական տեխնոլոգիաների նախարարի տեղակալ Բորիս Դեմիրխանյանն էլ հույս հայտնեց, որ նման ձևաչափով միջոցառումները շարունական կլինեն, դրանք կանցկացվեն ոչ միայն Բրիտանիայում, այլև Հայաստանում: Արդյունքում, ըստ նրա, կծնվեն համատեղ ծրագրեր, որոնք կարևոր են ոչ միայն բիզնեսի զարգացման, այլև՝ երկու երկրների մշակույթների փոխանակման տեսանկյունից:

«Համոզված եմ, որ 17 ընկերությունները լավագույնս կներկայացնեն Հայաստանի ՏՏ ոլորտը, բացի այդ, վստահ եմ, որ կան թաքնված ռեսուրսներ, որոնք այս միջոցառման շրջանակներից բխող արդյունքներում կբացվեն»,- ասաց Բորիս Դեմիրխանյանը:

Նշենք, որ Լոնդոնում կայանալիք բիզնես միջոցառումը բաղկացած է լինելու երկու հիմնական մասից՝ Հայաստանի և հայկական ՏՏ ընկերությունների մասին պրեզենտացիայից և հայկական ՏՏ ընկերությունների ու բրիտանական բիզնեսների ներկայացուցիչների միջև անհատական հանդիպումներից: Սա յուրահատուկ հնարավորություն է, որն ապահովվել է Բրիտանական դեսպանատան ֆինանսավորմամբ, «Բի Էս Սի» Բիզնեսի Աջակցման Կենտրոնի հետ համատեղ:

Նախաձեռնության գործընկերներն են Enterprise Europe Network, Newable, East Invest բրիտանական ընկերությունները, Լոնդոնի առևտրա-արդյունաբերական պալատը, Ինֆորմացիոն տեխնոլոգիաների ձեռնարկությունների միությունը, ՄԹ-ում Հայաստանի դեսպանատունը, ՓՄՁ ԶԱԿ-ը, ՀՀ առևտրա-արդյունաբերական պալատը: