Ձեր վստահելի աղբյուրը

Կենտրոն, Նուբարաշեն, Էրեբունի վարչական շրջաններն ընդգրկող թիվ 4 ընտրատարածքում «Ելք» դաշինքն առաջադրել է 6 թեկնածուի: Այստեղ պայքարելու են ԱԺ պատգամավոր Նիկոլ Փաշինյանը, Ալեն Սիմոնյանը, ով  «Մեդիա Նյուս» ՍՊԸ-ում խմբագիր է աշխատում:

Թեկնծուներից երկուսը՝ Էդուարդ Աղաջանյանն ու Քրիստինե Պողոսյանն անհատ ձեռնարկատերեր են, Անի Խաչատրյանը չի աշխատում, Տիգրան Ավինյանը «Իգիթյան» ՍՊԸ տնօրենն է:

«Ազատ դեմոկրատներ»-ից այս ընտրատարածքում պայքարելու է ԱԺ պատգամավոր Հրանտ Բագրատյանը: Հիշեցնենք, որ նա ու Նիկոլ Փաշինյանը խորհրդարան էին մտել ՀԱԿ ցուցակով:
Կուսակցությունն այստեղ առաջադրել է նաև «Էլեկտրիկ Երևան» ՀԿ նախագահ Նարեկ Այվազյանի թեկնածությունը: Տարածքային ցուցակում ներառված է 8 մարդ, նրանցից 3-ը կանայք են:

«Հայկական վերածնունդ»-ն այս ընտրատարածքում առաջադրել է 13 քաղաքացու թեկնածություն, նրանցից չորսը կանայք են:
Հասարակությանն առավել ծանոթ է Հայ գրողների միության նախագահ Աբգար Ափինյանը: Թեկնածուների թվում են անհատ ձեռնարկատեր Արտաշես Հովհաննիսյանը, Ազգային վիճակագրական ծառայության աշխատակից Արթուր Օհանյանը, դասախոս Լիանա Մանուկյանը և այլք:

«Ծառուկյան» դաշինքն այստեղ առաջադրել է 13 թեկնածու, նրանցից երեքը կանայք են:
Առավել հայտնի են Կենտրոնի նախկին  թաղապետ, ՀՀՇ-ական Արարատ Զուրաբյան, ԲՀԿ-ական Նապոլեոն Ազիզյանը, ԱԺ պատգամավոր Վահե Էնֆիաջյանը,  Փաստաբանների պալատի անդամ Գայանե Լյուդվիկյանը, ԱԺ պատգամավորի օգնական Արևիկ Նավոյանը:

Կոնգրես-ՀԺԿ դաշինքը թիվ 4-ում առաջադրել է 13 թեկնածու, նրանցից 9-ը չեն աշխատում,  7-ը կանայք են:
Այստեղ պայքարելու է ՀԱԿ  խմբակցության ղեկավար Լևոն Զուրաբյանը,  ակտիվիստ Արեգ Գևորգյանը,  ՀԺԿ-ից Ալլա Հովհաննիսյանը, Լուսինե Չալաբյանը և այլք:

Հայաստանի Հանրապետական կուսակցությունն այստեղ առաջադրել է 13 թեկնածու, նրանցից 5-ը կանայք են, չորսը՝ անկուսակցական:
Ցուցակի առաջին համարի ներքո Հակոբ Բեգլարյանն է, նա Երևանի նախկին քաղաքապետ Գագիկ Բեգլարյանի եղբայրն է, նա քաղաքաշինության պետական կոմիտեի նախագահի տեղեկալն է:
Ցուցակում ներառված են նաև ուսուցիչ, բուժքույր, դպրոցի տնօրեններ, Կենտրոն և Էրեբունի վարչական շրջանների աշխատակազմերի աշխատակիցներ և այլք:

Հայաստանի Կոմունիստական կուսակցությունն այս ընտրատարածքի տարածքային ցուցակում ներառել է 9 թեկնածու, նրանցից երեքը կանայք են: Թեկնածուների թվում երկու թոշակառուներ կան՝ Վազգեն Մարտիրոսյան, Ամալիա Տերտերյան:
Հասարակության  առավել հայտնի է Դմիթրի Աթբաշյանը, ով ավիատորների միության նախագահն է, եղել է ՔԱԳՎ նախկին պետ:

Օհանյան-Րաֆֆի-Օսկանյան դաշինքն առաջադրել է 13 թեկնածու, որից չորսը կանայք են:
Այստեղ պայքարելու են «Արաբո» ՀԿ նախագահ Մանվել Եղիազարյանը, Գագիկ Գինոսյանը, անկուսակցական Անդրիաս Ղուկասյանը, ով կալանավորված է, անկուսակցական Արման Մուշեղյանը, «Ժառանգություն»-ից՝ Սուսաննա Մուրադյանը, Անուշ Խաչատրյանը, ով «Թևանյան» ՍՊԸ-ում սրբագրիչ է աշխատում:

ՀՅԴ-ի տարածքային ցուցակում 12 թեկնածուներ կան, հինգը կանայք են: Թեկնածուներից 7-ն անկուսակցական են: Նրանք հիմնականում ԿԳ նախարարություն, ուսումնական հասատատությունների աշխատակիցներ են:
Այստեղ Դաշնակությունից պայքարելու են Բագրատ Եսայանը, ով ԿԳ նախարարի խորհրդականն է, Անահիտ Հարությունյանը, ով ԿԳՆ կրթության պետական տեսչության պետն է, Արսեն Մանուկյանը, ով «Սիրո Մեղեդի» ՍՊԸ տնօրենն է: