Լևոն Ալթունյանի՝ Շիրակի մարզ կատարած աշխատանքային այցը սկսվել է բարի լուրով
ՀՀ առողջապահության նախարար Լևոն Ալթունյանի Շիրակի մարզ կատարած աշխատանքային այցը սկսվել է բարի լուրով։ Ախուրյանի մոր և մանկան առողջության կենտրոնի տնօրեն Սևակ Ավագյանը նախարարին և նրան ուղեկցող Շիրակի մարզպետ Հովսեփ Սիմոնյանին տեղեկացրել է, որ երեկ գիշեր կենտրոնի զանգը ղողանջել է 3, իսկ նախորդ գիշեր 7 անգամ՝ ավետելով նույնքան երեխաների լույս աշխարհ գալու մասին։ Այս մասին հայտնում են ՀՀ առողջապահության նախարարության լրատվական ծառայությունից:
ՀՕՄ-ի կողմից ստեղծված այս բուժհաստատությունն արդեն 20 տարի է, ինչ իրականացնում է Ախուրյանի նախկին վարչատարածքի 7 գյուղերի մանկական ազգաբնակչության, ինչպես նաև կանանց ու հղիների գինեկոլոգիական բուժօգնությունը։ Բնակչության վստահության մասին է խոսում այն հանգամանքը, որ 2005թ. ծավալված մանակաբարձագինեկոլոգիական ստացիոնար բաժանմունքում արձանագրվող ծնունդներն ամենաշատն են մարզի ծննդօգնության այլ հիմնարկությունների համեմատ։
Լևոն Ալթունյանը շրջել է կենտրոնում, ծանոթացել իրականացվող ծառայություններին, ցուցանիշներին, ինչպես նաև հիվանդների առողջական վիճակով։ Այստեղ իրականացվում են ոչ միայն ռենտգեն, համակարգչային տոմոգրաֆիական և այլ հետազոտություներ, այլև մամոգրաֆիական, որն, ի դեպ, մարզում եզակի է։
Լևոն Ալթունյանը կենտրոնի բուժանձնակազմի հետ քննարկել է ինչպես առկա խնդիրների լուծման հնարավորությունները, այնպես էլ՝ հետագա զարգացման հեռանկարային ծրագրերը։
Այնուհետև նախարարը մարզպետի ուղեկցությամբ այցելել է Ախուրյանի բժշկական կենտրոն, որի պոլիկլինիկան սպասարկում է շրջակա գյուղերի 39 հազար բնակչությանը։ Չնայած շենքային սուղ պայմաններին, 15 մահճակալով ստացիոնարում իրականացվում են ընդհանուր պրոֆիլի վիրահատություններ։
Կենտրոնի ղեկավարությունը նախարարին խնդրել է շտապօգնության ծառայությանը հատկացնել մեկ մեքենա, քանի որ շրջակա 35 գյուղի սպասարկումը՝ այն էլ միջհամայնքային դժվարանցանելի ճանապարհներով և հատկապես ձմռան ամիսներին, խիստ դժվար է ունեցած հնամաշ միակ մեքենայով։ Նախարար Ալթունյանը խոստացել էվ կենտրոնին հատկացնել շտապօգնության նոր մեքենա։
Մարզ կատարած այցի առաջին կանգառից ստացած տպավորությունները կիսելով լրագրողների հետ՝ Լևոն Ալթունյանն ասել է. «Ախուրյանի մոր և մանկան առողջության կենտրոնից ստացած տպավորությունը միանշանակ դրական է։ Ուրախալի է, որ մահճակալների 87 տոկոս հագեցվածության պայմանում չկան բարդություններ և դժգոհություններ։ Դա խոսում է բժշկական անձնակազմի պրոֆեսիոնալիզմի և արդյունավետ կառավարման մասին։ Ինչ վերաբերում է Ախուրյանի բժշկական կենտրոնին, ապա ակնհայտ է, որ շենքային պայմանների և այլ բարեփոխումների անհրաժեշտություն կա։ Անցած տարվա նոյեմբերից նախարարությունում ստեղծված համակարգի բարեփոխումների աշխատանքային խումբն այժմ ուսումնասիրություններ է կատարում ոլորտի ճարտարապետության համակարգային փոփոխություններ կատարելու նպատակով»։
Ուշագրավ է, որ Ախուրյանի երկու բժշկական հաստատություններում էլ ակտիվորեն ինտեգրվում են էլեկտրոնային առողջապահության համակարգին։
Լրահոս
Տեսանյութեր
Մի դարձեք ագրեսիվ գովազդի զոհ. Պիպոյանի խորհուրդը՝ «Սև ուրբաթ»-ին
