Ձեր վստահելի աղբյուրը

Ապարանում Կոնգրես-ՀԺԿ կուսակցությունների դաշինքի անդամները նախընտրական քարոզարշավի շրջանակում հանդիպում են իրենց կուսակցությունների ակտիվի,  տարածքային թեկնածուների հետ: ՀԱԿ փոխնախագահ Արամ Մանուկյանն ասաց, որ  մարտի կեսերից կորոշեն՝ ինչպես շարունակել քարոզարշավը՝ ելնելով տարածքային կառույցների, շտաբների առաջարկներից:

Խոսելով իրենց դաշինքի նախընտրական ծրագրի մասին, նա նշեց, որ նոր շարժում են սկսում՝ խաղաղության գործընթաց՝ Հայաստանում արժանապատիվ խաղաղության հաստատման հասնելու  համար:

«Մենք բաց ասում ենք, որ  հաղթանակները փոխզիջումների մեջ են: Մենք Բաքուն չենք գրավել, կապիտուլյացիա Ադրբեջանը չի հայտարարել, հակառակը չի եղել: Զիջումները, փոխզիջումները բոլորը համաձայնեցված են միջազգային կազմակերպությունների հետ:  Փոխզիջման տարբերակը բերելու է Հայաստանի ճանապարհների բացում, տնտեսության զարգացում, ինտեգրացման հնարավորություն, զինվորական ամենօրյա զոհերի դադարեցում, Ղարաբաղի տարածքի ֆիզիկական անջատում Ադրբեջանից, որը պետք է երաշխավորվի միջազգայնորեն, խաղաղապահ զորքերի ներկայությամբ»,- նշեց նա:

Ա. Մանուկյանի խոսքով, եթե ապրիլի 2-ին ժողովուրդն իրենց խաղաղության կոնցեպտին կողմ քվեարկի, նշանակում է, որ իրենց գործընթացը շատ արագ կընդարձակվի, խորհրդարանում շատ լուրջ մեծամասնություն կունենան, խնդիրը կլինի արժանապատիվ, հաղթանակած խաղաղություն վաստակելն ու արձանագրելը:

ՀԱԿ  անդամ Մյասնիկ Մալխասյանի խոսքով, դաշինքի  «Խաղաղություն, հաշտություն, բարիդրացիություն» կարգախոսի գինը ոչ ոք այդքան լավ չգիտի, ինչքան ազատամարտիկները, ովքեր իրենց կյանքով են նվաճել այդ խաղաղությունը: