Ձեր վստահելի աղբյուրը

«Ծառուկյան» դաշինքի համամասնական ցուցակի երրորդ հորիզոնականը զբաղեցնող Նաիրա Զոհրաբյանը նախընտրական քարոզաշրավի շրջանակում այսօր շրջել է Տավուշի մարզի հինգ գյուղերով, ելույթներ ունեցել և հայտարարել, որ ապրիլի 2-ը  իշխանափոխության օր է լինելու:

Իր ելույթում Նաիրա Զոհրաբյանը նշել է, թե ՀՀԿ-ն ասում է՝ այս տարիների ընթացքում այնքան գործ է արել ժողովրդի համար, որ մարդիկ ապրիլի 2-ին երգ ու պարով ընտրելու է իրենց:

«Բա ինչո՞ւ են դռնեդուռ ընկած վախեցնում, ահաբեկում, որ հանկարծ չգնաք հանրահավաքներին, գործից կհանենք և այլն: Ասում եք, որ դուք  էնքան լավ իշխանություն եք, էս ժողովուրդն էլ ձեր նկարը պատերին դրած  7 հառ մոմ է վառում: Բա ինչո՞ւ եք վախենում,  դե, եկեք հանդիպեք ժողովրդին, ոնց որ՝ «Ծառուկյան» դաշինքի ներկայացուցիչներս, ոնց որ՝ Գագիկ Ծառուկյանը, կանգնեք,  բաց ճակատով նայեք ժողովրդին: Չեն կարող, որովհետև գիտեն՝ պատառ-պատառ, բզիկ-բզիկ կանեն, եթե մեկը համարձակվի գա»,- նշեց Նաիրա Զոհրաբյանը: 

Դիմելով տավշցիներին՝  ասաց, որ մեկ անգամ պետք է վճռական լինել. «Ազգովի պետք է մեր մեջ գտնենք այդ վճռականությունը՝ ապրիլի 2-ին վերջակետ դնելու այս իշխանության վրա»:

Նաիրա Զոհրաբյանը հայտնեց, որ «Ծառուկյան» դաշինքը իրատեսական ծրագիր է առաջարկում: «Այս վիճակում գտնվող ժողովրդին խաբելը: Հիմա էստեղ են գալու քաղաքական ուժեր և խոստումներ կտան, թե ձեր ավանդները մեկ օրում կվերադարձնեն, որ աշխատավարձը կդարձնեն 1000 դոլար: Չհավատաք ժողովուրդ, հարգանքի արժանի չէ այն քաղաքական ուժը, որը քվե պոկելու համար իր քաղաքացուն խաբում է: Մենք գրել ենք իրատեսական ծրագիր,  նշել 15 կետ, որը կկանգնեցնի երկրի փլուզումը» ,- ընդգծեց նա:

Նաիրա Զոհրաբյանը տավուշցիներին հորդորեց չհավատալ այն քաղաքական ուժերին, եթե նրանք իրենց հետ հանդիպման ժամանակ հայտարարեն, որ, օրինակ, նվազագույն աշխատավարձը կբարձրացնեն 200 հազար դրամի, թոշակը՝ 50 հազարով և այլն: Ըստ նրա՝  թոշակը հնարավոր  է առավելագույնը բարձրացնել  25 հազար դրամով, իսկ նվազագույն աշխատավարձը հասցնել 80 հազար դրամի:

Ըստ նրա՝ իրենց ծրագրում ներկայացրել են այն ուղիները,  արել են տնտեսական հաշվարկներ: «Մենք ձեզ առաջարկում ենք արժանապատիվ ծրագիր, իհարկե դա կյանքի կկոչվի, եթե «Ծառուկյան» դաշինքը ստանա 50+1 ձայն»,- նշեց Նաիրա Զոհրաբյանը: