Ձեր վստահելի աղբյուրը

«Օհանյան-Րաֆֆի-Օսկանյան» դաշինքն այսօր նախընտրական քարոզարշավ է իրականացնում Տավուշի մարզում:  Դաշինքի անդամները հանդիպում են ունեցել սահմանամերձ Չինարի գյուղի բնակիչների հետ։

«Հայաստանի Հանրապետության անվտանգությունն ու զարգացումը սկսվում են սահմանապահ գյուղերից: Մենք ամեն ինչ պետք է անենք, որպեսզի  սահմանապահ գյուղերի բնակչությունն իրենց վրա զգան այդ ամենը»,- իր խոսքում ասաց ՀՀ պաշտպանության նախկին նախարար, դաշինքի առաջին համար Սեյրան Օհանյանը:

Նա նշեց, որ Չինարին իր ուսերի վրա է տանում և հայ ժողովրդի նորօրյա պատմության ամբողջ հպարտությունը, և այն բոլոր դժվարությունները, որոնք այսօր գոյություն ունեն սահմանապահ գյուղում:

«Հայկական հզոր համայնքներ կան Մոսկվայում, Վաշինգտոնում, Փարիզում, բայց մեզ համար ամենահզոր համայնքը  Չինարն է, Մովսեսը, Կոթին, Բարեկամավանը, այն բոլոր բնակավարերը,  որտեղից սկսվում է մեր հայրենիքը»,- ասաց նա:

Ս. Օհանյանի խոսքով, առաջիկա ընտրություններին պետք է լուրջ վերաբերել, քանի որ միանգամից հինգ տարվա համար լուծում է կառավարման համակագի կարևոր օրգանները: Նա նշեց, որ քարոզարշավի ընթացքում քաղաքացիները կտեսնեն ընտրություններին մասնակցող ուժերին, կլսեն, թե ինչ ծրագրեր են իրականացնելու:

«Հանգիստ խղճով մեր վստահությունը տանք այն ուժերին, ովքեր ձեր կողքին են եղել, այն ուժերին, որոնք որ փորձելու են գյուղացու խնդիրները լուծել: Յուրաքանչյուր խնդիր լուծում կարող է ունենալ, պարզապես լուծողներ են պետք: Մեր թիմը համախմբած է, յուրաքանչյուր խնդրի համար լուծում է տալու»,- ասաց Ս. Օհանյանը:

Դաշինքի երկրորդ համար, ԱԳ նախկին նախարար Վարդան Օսկանյանը նշեց, որ առաջին անգամ է Չինարիում:

«Իսկապես սահմանպահ բնակավայր է: Նման բնակավայրեր Հայաստանում բազմաթիվ են: Մենք հատուկ ուշադրություն ենք դարձնելու այս բնակավայրերին, բայց ուզում ենք խնդիրն ավելի լայն դնել, որ վերջիվերջո մենք մեր երկրում իրավիճակ պետք է փոխենք, որովհետև երկրում բարելավումը բերելու է  բոլոր բնակավայրերի, ողջ ժողովրդի կյանքի, կենսամակարդակի բարձրացման»,- ասաց նա: