Ձեր վստահելի աղբյուրը

Gallup International Association-ի հայաստանյան ներկայացուցչությունն իրականացրել է   հետազոտություն՝  «ԱԺ ընտրություններ 2017. Քաղաքական կուսակցությունների և դաշինքների մեկնարկային ցուցանիշները» թեմայով:  Լրագրողների հետ հանդիպմանը  հարցման արդյունքները ներկայացրեց Gallup International Association-ի հայաստանյան ներկայացուցչության տնօրեն Արամ Նավասարդյանը:

Հարցմանը մասնակցել է 1146 քաղաքացի: Հետազոտությունն իրականացվել է փետրվարի 23-ից մարտի  2-ը Հայաստանի տարածքում:

Հարցին՝ եթե առաջիկա կիրակի տեղի ունենային խորհրդարանական ընտրությունները, ապա համամասնական ընտրակարգով որ կուսակցության կամ կուսակցությունների դաշինքի օգտին կքվեարկեիք՝
«Ծառուկյան»` 26,4 տոկոս
«ՀՀԿ»` 22,8 տոկոս
«Ելք»` 4,3 տոկոս
«ՀՅԴ»` 3,9 տոկոս
«Ազատ դեմոկրատներ»` 3,4 տոկոս
«Հայկական վերածնունդ»՝ 2,7 տոկոս
«Կոնգրես-ՀԺԿ» դաշինք՝ 2,6 տոկոս
«Օհանյան-Րաֆֆի-Օսկանյան» դաշինք` 1,8 տոկոս
«Կոմունիստական կուսակցություն»՝ 1
14,1  տոկոսը հրաժարվել է պատասխանել, 17 տոկոսը դժվարացել է պատասխանել:

Պատասխանելով լրագրողի հարցին, թե ինչո՞վ է պայմանավորած «Ծառուկյան» դաշինքի բարձր ցուցանիշը, Ա.Նավասարդյանն ասաց. «Նոյեմբերին՝ մեր հետազոտության ժամանակ, գրեթե ցուցանիշները հավասար էին, տարբերություն կար մարզերում, որտեղ ավելի բարձր ցուցանիշ ուներ ԲՀԿ-ն, իսկ Երևանում՝ ՀՀԿ-ի մոտ էր բարձր: Այդքան էլ ոչ սպասելի արդյունք չէ: Գտնվում ենք մեկնարկային իրավիճակում, ըստ երևույթին այդ երկու դոմինանտ կուսակցությունները, որոնք որ արձանագրել են ամենաբարձր ցուցանիշները, տարբերությունը երեք տոկոս է: Քարոզարշավը շատ բան կարող է փոխել, որ կողմ կփոխի՝ չեմ կարող ասել: Դա կախված է կուսակցությունների կողմից կազմակերպված, իրականացված քարոզարշավի արդյունքներից: Նույնը կարող եմ ասել մյուս բոլոր կուսակցություններին: Ինչպես տեսնում եք՝ պոտենցիալ խորհրդարան անցնող կուսակցությունները 4-5 է՝ «Ծառուկյան» դաշինք, ՀՀԿ, «Ելք» դաշինք, ՀՅԴ, մոտ է նաև ցուցանիշներով «Ազատ դեմոկրատներ» կուսակցությունը: Մնացածները գրանցելով մի փոքր ցածր ցուցանիշներ՝ չեմ կարող վստահ ասել՝ արդյո՞ք կկարողանան շեմը հաղթահարել»:

Նա նաև ասաց, որ համապետական ընտրակարգով ունեն ոչ կանխատեսելի պատկեր, քանի որ չեն անդրադարձել տարածքային  քվեարկությանը, որը կարող է շատ և շատ փոխել. «Նոր ընտրակարգով եթե այդ ցածր ցուցանիշներ գրանցած կոսւակցությունների ռեյտինագայիններն ունենան մեծ քվեներ, այս պատկերը կարող է շատ փոփոխություններ կրել»:

Հարցին, թե սովորաբար մեկնարկային և երկրորդ փուլի հարցումների միջև տարբերությո՞ւնը շատ է լինում, նա ասաց, որ չի կարծում դոմինանտ ցուցանիշներ արձանագրած կուսակցությունների պարագայում  որոշակի տարբերություն լինի, քանի որ շատ մոտ են երկու կուսակցությունները, կարող են հավասարվել, կարող են մեկը մյուսին անցնել, իսկ ինչ վերաբերում է ցածր ցուցանիշներ գրանցած կուսակցություններին, ռեյտինգային ընտրակարգը կարող է փոխել:

Հարցման մասնակիցները պատասխանելով հարցին, թե պատրաստո՞ւմ եք անձամբ մասնակցել ապրիլի 2-ին կայանալիք խորհրդարանական ընտրություններին, հետևյալ պատկերն է ստացվել՝ անպայման մասնակցելու եմ՝ 59,9 տոկոս, հավանաբար մասնակցելու եմ՝ 25,7 տոկոս, հավանաբար չեմ մասնակցելու՝ 4,3 տոկոս, միանշանակ չեմ մասնակցելու՝ 7,1 տոկոս։

«Մեր փորձից ասեմ, որ նրանք, ովքեր նշում են, որ անպայման մասնակցելու են, գնում են և կատարում են իրենց քվեարկությունը, տատանվողները հիմնականում չեն մասնակցում: Մեր սպասումներով՝ 50-60 տոկոս կլինի մասնակցությունը»,- ասաց Ա.Նավասարդյանը: