ԼՂ հիմնախնդրի լուծման տարբերակները՝ ընտրություններին մասնակցող քաղաքական ուժերի ծրագրերում
«Մեր ժողովրդի համար այսօր թիվ մեկ խնդիրը ղարաբաղյան հիմնախնդրին է: Մեր դաշինքը համոզված է, որ խնդրի լուծումը պետք է լինի Արցախի ինքնորշման արդեն 25-ամյա փաստի միջազգային ճանաչումը՝ այսինքն Արցախի անկախության միջազգային ճանաչումը»,- «Արտաքին քաղաքանության և անվտանգության տեսլականը քաղաքական ուժերի նախընտրական ծրագրերում» թեմայով քննարկմանն ասաց «Օհանյան-Րաֆֆի-Օսկանյան» դաշինքից Գեղամ Նազարյանը:
Նա նշեց, որ դրան հասնելու համար անհրաժեշտ է, որ Հայաստանը լինի ուժեղ, ժողովրդավար, ունենա միջազգային մեծ կշիռ, ունենա հզոր տնտեսություն:
«Ազատ դեմոկրատներ» կուսակցությունից Ստեփան Սաֆարյանն ասաց, որ արցախյան խնդրով ունեն բավականին լուրջ ծրագիր, որն առաջին հերթին խնդիր է դնում բարձրացնել Հայաստանի և Արցախի համար անվտանգության մակարդակը, այդ թվում արտաքին և ներքին քաղաքականությունների արմատական վերանայման միջոցով: Նրա խոսքով, բանակցությունների համար նախ պետք է զսպել հակառակորդին, ապահովել բանակցությունների համար անվտանգության միջավայր, բանակցությունները չեն կարող տեղի ունենալ պատերազմական գործողությունների կամ դրա սպառնալիք ներքո:
Ս. Սաֆարյանի կարծիքով, Մադրիդյան սկզբունքներն արմատապես պետք է վերանայման ենթարկվեն:
«Հայկական վերածնունդ» կուսակցությունից Մհեր Շահգելդյանն ասաց, որ առաջանային հարցը բանակ-տնտեսություն հարաբերակցություն է:
«Մենք պետք է հասկանանք, որ գործ ունենք մի երկրի հետ, որն ուժից այն կողմ ոչինչ չի հասկանում: Բազմաթիվ գործողությունները, ագրեսիվ գործողությունները դա է ցույց տալիս: Այսինքն առաջնայինը բանակի ամրապնդումն է, տնտեսության ամրապնդումն է», - ասաց նա:
Մ.Շահգելդյանի խոսքով, Արցախը տարբեր տարբերակներով պետք է ներկայացված լինի միջազգային կազմակերպություններում:
«Այստեղ անհրաժեշտ է նախաձեռնողական քաղաքականություն»,- նշեց «Հայկական վերածնունդ» կուսակցության ներկայացուցիչը:
Նա նաև ասաց, որ Մադրիդյան սկզբունքները պետք է փոփոխությունների ենթարկվեն, անհրաժեշտ է համահայկական քննարկում՝ հասկանալու համար, թե փոփոխվող միջազգային իրավիճակում ինչպիսի մոտեցումներ պետք է լինեն:
«Ծառուկյան» դաշինք Արարատ Զուրաբյանը նշեց, որ կողմնակից են փոխզիջումային լուծման տարբերակին, բայց առարկայական կարևորություն են տալիս նրան, որ Արցախը պետք է այդտեղ կարևորագույն դեր ունենա, մասնակից լինի այդ պրոցեսին:
«Ամեն ինչ պետք է անենք, որ Արցախը վերադառնա բանակցությունների սեղանին»,- շեշտեց նա:
Հայաստանի Կոմունիստական կուսակցություն Վազգեն Սաֆարյանի խոսքով, ԼՂ խնդրի լուծումը տեսնում են իրենց կուսակցության մեջ ամրագրված մի կարևորագույն սկզբունքով՝ ազգերի ինքնորոշման սկզբունք, որը միշտ էլ գերակայել է տարածքային ամբողջականության նկատմամբ:
«Հետևողականորեն պայքարենք, համաշխարհային հանրային գիտակցության մեջ բարձրացնենք ազգերի ինքնորոշման սկզբունքի գերակայության մասին դրույթը, հասնենք դրա իրականացմանը»,- ասաց նա:
Վ. Սաֆարյանի խոսքով, մադրիդյան սկզբունքները հնացել են, նոր մոտեցումներ պետք է դրսևորեն:
«Ելք» դաշինք Մանե Թանդիլյանն ասաց, որ իրենք ունեն հաջորդական քայլերից բաղկացած լուծում, որը կբերի Արցախի անկախությանը:Նրա խոսքով, առաջին քայլն է՝ Հայաստան-Ադրբեջան ռազմական հավասարակշռությունը պետք է վերականգնվի: Երկրորդ՝ Արցախը վերադարձվի բանակցությունների սեղանին: Երրորդ՝ պետք է ունենալ տեխնոլոգիական նոր լուծումներով վերազինված բանակ: Մ. Թանդիլյանը նաև նշեց, որ բանակն ու արտաքին դիվանագիտությունը պետք է միասին աշխատեն, այլապես հարցը հայանպաստ լուծում չի ունենա:
ՀՅԴ -ից Կիրո Մանոյանն ասաց, որ իրենք Արցախի հարցը տեսնում են ի վերջո Հայաստանի հետ միացումով, բայց անկախության հռչակումը, ճանաչումը մարտավարական քայլ է, որին աջակցում են իրենք:
Նա նշեց, որ իրենք ճիշտ են համարում Հայաստան-Արցախ ռազմաքաղաքական համագործակցության պայմանագրի ստորագրումը:
Նշենք, որ քննարկմանը մասնակցելու հրավեր էին ուղարկել ՀՀԿ կուսակցությանը և «ՀԱԿ-ՀԺԿ» դաշինքին, սակայն այդ ուժերից մասնակիցներ չկային: Քննարկումը վարողն ասաց, որ ՀՀԿ շտաբից նշել էին, որ այս փուլում նպատակահարամար չեն գտնում մասնակցել նման ֆորմատով քննարկումների, բանավեճերի:
Լրահոս
Տեսանյութեր
ՈւՂԻՂ. Տրանսպորտը թանկացնում են նախկինների մերժած հաշվարկով. Պիպոյանը փաստաթղթեր է հրապարակում
