Ձեր վստահելի աղբյուրը

«Առողջապահության կազմակերպիչների միավորում» հասարակական կազմակերպությունը հանդես է եկել 10 մարզում «բաց դռների օրեր» անցկացնելու նախաձեռնությամբ, ըստ որի՝ նախատեսվում է իրականացնել նեղ մասնագիտական խորհրդատվություն, անհրաժեշտության դեպքում` լաբորատոր գործիքային հետազոտություններ:

Ինչպես այսօր լրագրողների հետ հանդիպման ժամանակ հայտնեց ՀՀ առողջապահության նախարարության բուժօգնության քաղաքականության վարչության պետ Ծաղիկ Վարդանյանի ասուլիսը, բարձրացված հարցերի քննարկումների  արդյունքում որոշվել է մարզային 71  բժշկական կազմակերպությունում  իրականացնել «բաց դռների օրեր»  առողջապահական միջոցառումները, որը կնպաստի նաև Երևանի առաջատար մասնագետների և  տեղում մասնագիտական գործունեություն իրականացնող բժիշկների  կապերի ամրապնդմանը, փորձի փոխանակմանը:

Նրա խոսքերով՝ արդեն իսկ իրականացվել է 21 միջոցառում, որի արդյունքում շուրջ 3000 մարդ բուժզննում է անցել:

Ծաղիկ Վարդանյանը նշեց, որ մարզերում այսօր  նեղ մասնագետների խնդիր կա: «Եթե մասնագետների հագեցվածությամբ համեմատենք Երևանի հետ, ապա մարզերում 3 անգամ մասնագետների, հատկապես նեղ ուղղվածության մասնագետների, պակաս կա: Առաջարկ եղավ մարզային այցելություններով լրացնել համապատասխան հիվանդությունների ախտորոշման, բուժման գործում եղած բացը»,- ասաց նա:

Նա նաև նշեց, որ մարզերում և Երևանում աշխատող բժիշկների միջև կա անջրպետ, ուստի պետք է այնպիսի միջոցառումներ իրականացվեն, որ բժիշկները  կարողանան միասին աշխատել, պետք է լինեն նաև ասոցիացիաներ, որոնցում ակտիվ ներգրավված լլինեն մարզային բժիշկները:
Ուռոլոգ  Գևորգ Գրիգորյանը, ով մասնագիտական խմբի հետ նոր է վերադարձել Սյունիքի մարզից, նշեց, որ այս  այցելությունից հետո եկել է այն եզրահանգման, որ մարզերում իսկապես կան լավ մասնագետներ և սխալ է այն կարծիքը, թե լավագույն բժիշկները  աշխատում են միայն մայրաքաղաքում:

«Բնակիչները վստահում են տեղի բժիշկներին, իսկապես բավականին առաջադեմ, հմուտ մասնագետներ կան, իսկ այն կարծրատիպը, թե անպայման պետք է Երևանում բուժօգնություն ստանալ կամ լավ մասնագետը պետք է  աշխատի միայն  Երևանում,  այլևս չկա»,- ասաց  Գևորգ Գրիգորյանը:

Նրա խոսքերով՝ Սյունիքի մարզի բժշկական հաստատությունների տեխնիկական հագեցվածությունը նույնպես բարձր մակարդակ ունի: Երեք բուժհաստատությունները հագեցված են անհրաժեշտ սարքավորումներով:

«Ես ուռոլգիական տեսանկյունից ասեմ. այնտեղ կան սարքավորումներ, որոնք Երևանի  ոչ բոլոր կենտրոններն ունեն: Սակայն  առկա է նեղ մասնագետների պակաս, ինչը համապատասխան ծրագրերի կողմից կլրացվի»,-ասաց Գևորգ Գրիգորյանը:

Նրա ղեկավարած թիմը «Բաց դռների շրջանակներում հետազոտել է  652 քաղաքացու: Հետազոտություններն իրականացվել են Կապանում, Մեղրիում և Քաջարանում:

Ծաղիկ Վարդանյան  նշեց, որ մարզեր կատարած այցելությունների արդյունքները կամփոփվեն մարտի վերջին, սակայն նախնական դիտարկումների համաձայն, մարզերում ակնաբույժի խիստ պակաս կա: