Ձեր վստահելի աղբյուրը

Վանաձորում վնասել են «Ելք» դաշինքի քարոզչական պաստառները՝ մասնավորապես պատռել, մրոտել այն հատվածները, որտեղ պատկերված է ԱԺ պատգամավոր, ծնունդով կիրովականցի Էդմոն Մարուքյանը:

Դաշինքի մաս կազմող «Լուսավոր Հայաստան» կուսակցության նախագահ Մարուքյանը Panorama.am-ի հետ զրույցում կածիք հայտնեց, որ կատարվածը թաղի խուժանի ձեռքի գործն է:

«Իրավապահներն արդեն այնտեղ են եղել, մենք հաղորդում ենք տվել: Մենք տեսագրություն ունենք, մնացածը ոստիկանության  գործն է, թող հայտնաբերեն, տեսնեն, թե ով է հրահանգել թաղի խուժանին, որ գնան մեր շտաբի վրա հարձակվեն, կոնկրետ իմ նկարը վնասեն:  Քաղաքի այլ վայրերում էլ են արել նման բան»,-ասաց Մարուքյանը:

Նա համոզված է, որ գործողություններն իրենց քաղաքական ուժի ու հենց իր դեմ են ուղղված. «Կոնկրետ էդ մարդիկ եկել են, իմ նկարը պատռել: Էդ խի՞ կողքի շտաբերին չեն վնասել: Էդ փողոցի վրա 3-4 հատ նախընտրական շտաբ կա»:

Մարուքյանն ասաց, որ դաշինքին գովազդային մեծ վահանականեր են հատկացված, ստիպված են դրանց վրա քարոզչական պաստառներ փակցնել:

«Դա մեզ համար ֆինանսական առումով բարդություն է ստեղծում, բայց այլ տարբերակ չունենք: Եթե մենք պիտի  դնենք, իրենք մեր հետևից  գնան, վառեն, ճղեն, չգիտեմ: Մեր ամեն ծախսած լուման ՀՀ քաղաքացուց հանգանակցած գումար է, դա ուղղակի հարված է ՀՀ քաղաքացուն: Մենք սարսափելի սուղ միջոցներ  ենք ծախսում, այս պահի դրությամբ գովազդային մեկ րոպե չունենք գնած հեռուստաընկերություններից»:

Լուսանկարներն ու տեսանյութն իր ֆեյսբուքյան էջում հրապարակել է Էդմոն Մարուքյանի եղբայրը՝ Քրիստ Մարուքյանը: