Ձեր վստահելի աղբյուրը

«Լուսավոր Սահման»-ն արդեն LED լամպերով լուսավորել է Հայաստանի և Արցախի սահմանամերձ յոթ գյուղի ընտանիքների տները: Կամավորական նախաձեռնության  նպատակն է սահմանամերձ գյուղերում լուսադիոդային լամպերի տեղադրման բարեգործական ակցիայի միջոցով թեթևացնել սահմանամերձ գյուղերի բնակիչների հոգսերը՝ փորձելով կրճատել նրանց էլեկտրաէներգիայի սպառման համար ամենամսյա վճարները և սովորեցնել բնակիչներին խնայողության խելացի միջոցների մասին:

Լրագրողների հետ հանդիպմանը ՀՀ էներգետիկ ենթակառուցվածքների և բնական պաշարների փոխնախարար Հայկ Հարությունյանն ասաց, որ իր բնակարանում տեղադրելով լուսադիոդային լամպեր, հոսանքի ծախսը 30-40 տոկոսով նվազեց:

«Խորանալով հասկացանք, որ գյուղական համայքներում խնայողությունը կարող է ավելի մեծ լինել, քանի որ այնտեղ էլեկտրոնային սարքավորումների քանակն ավելի սակավ է, քան քաղաքային համայնքերում: 2015 թվականին կառավարություն ծրագիր ներկայացվեց, որոշվեց իրականացնել պիլոտային ծրագրեր»,-  նշեց փոխնախարարը:

Նախաձեռնության մեկնակը տրվել է 2016 թվականի նոյեմբերին: Հ. Հարությունյանն ասաց, որ այս պահին հանգանակված գումարի չափը  կազմում է 21 միլիոն դրամ, որով գնվել է ավելի քան 8000 LED լամպ, 2000-ից ավելի ընտանիք ամսական խնայում է մինչև 4000 դրամ: 

«Հետաքրքիր դոնորների կառուցվածք ունենք. առաջին դոնորը «Հայկական էլեկտրական ցանցեր» ընկերությունն է, այնուհետև կառավարությունը, էներգետիկ ընկերություններ, բազմաթիվ անհատներ, տարբեր ՀԿ-ներ, միջազգային կառույցներ»,- նշեց Հ. Հարությունյանը:

Նրա խոսքով, ամեն երկու շաբաթը մեկ նախատեսվում է մեկ գյուղի LED լամպերով լուսավորում:

«Մեր նպատակն է Հայաստանի 36 սահմանամերձ համայնքի և  Ղարաբաղի բոլոր գյուղական համայնքների LED լամպերով լուսավորումը:  Հստակ ժամանակացույց ասելը դժվար կլինի, քանի որ կապված է հանգանակություններից: Կարծում եմ՝ տեմպը չի նվազի, հետաքրքրությունն ավելանում է»,- ասաց նա՝ տեղեկացնելով, որ ծրագրի մեկնարկին LED լամպի արժեքը մոտ 1350 դրամ էր, հիմա նվազել է՝ մոտ  1000 դրամ:

Հ. Հարությունյանի խոսքով, կարևորում են լուսադիոդային լամպերի որակը և մշակել են որոշակի որակային չափանիշներ՝ համոզվելու համար, որ գյուղացիները ստանում են որակյալ ապրանք: Ընկերության կողմից նվիրաբերված  լամպերն ունեն 3 տարվա երաշխիք: Լամպերը տրամադրվում են բացառապես բնակիչներին՝ տունը լուսավորելու համար: Ամեն ընտանիքի նվիրաբերվում է  5 LED լամպ:

«Շտիգեն» ընկերության տնօրեն, «Լուսավոր սահման» նախագծի համակարգող Հայկ Շեկյանը ծրագիրը կարևորեց նաև այն առումով, որ ի վերջո սահմանամերձ գյուղերի բնակիչները  զգում են ուշադրություն:

«Իրենց համար կարևոր է, որ իրենք մենակ չեն: Ծրագիրը պահանջված է ոչ միայն լամպերի, խնայողության առումով, նաև հոգեբանական առումով: Հասարակական առումով կարևոր ֆունկցիա է կատարում»,- նշեց նա:

«Երիտասարդ ինժեներների ասոցիացիա» ՀԿ նախագահ, «Լուսավոր սահման» նախագծի համակարգող Հովհաննես Կարապետյանն ասաց, որ կամավորները, ովքեր մասնակցում են «Լուսավոր Սահման»-ի ակցիային, տեսնելով ծրագրի արդյունավետությունը, իրենց բնակարաններերն էլ սկսել են լուսավորել LED  լամպերով:

Հայկ Հարությունյանն ասաց, որ  2015 թվականին ՀՀ ներմուծվել է 75 հազար հատ LED լամպ,  2016-ին այդ թիվը հասել է 1 միլիոն 600 հազարի:

«20 անգամ այս ոլորտում աճ կա»,- նշեց նա՝ հավելով, որ 2016 թվականին  խնայողություն ունեն բնակչության ոլորտում, պետական շենքերում,  ոռոգման համակարգում: