Ձեր վստահելի աղբյուրը

Այսօր՝ մարտի 8-ին, Երևանի Շենգավիթ վարչական շրջանում տեղի ունեցավ Ազատ դեմոկրատներ կուսակցության թիվ 3 ընտրատարածքի թեկնածուների քարոզարշավը: Պատգամավորության թեկնածուներից Անահիտ Բախշյանը, կուսակցության նախընտրական ծրագրի բուկլետներ և ծաղիկներ բաժանելով, պտույտ կատարեց Գարեգին Նժդեհի հրապարակում։ Անցորդները բավական ջերմ ընդունեցին նրան, նույնիսկ անհանգստացան՝ արդյոք թեթև պիջակով այս եղանակին չի՞ մրսի։

Անահիտ Բախշյանը հերթով կանգ առավ մեկ առևտրական կանանց, մեկ՝ փողոցով անցնող երիտասարդների ու տարեցների մոտ՝ զրուցելով և նախընտրական ծրագրի դրույթները ծանուցելով վերջիներիս։ Նա նաև հայտարարեց, որ ինքն ու իր կուսակիցները քարոզչությունը կշարունակեն մետրոյի «Շենգավիթ» կայարանի հարակից տարածքում։

Լրագրողների հետ զրույցում էլ Ազատ դեմոկրատների պատգամավորության թեկնածուն նշեց, որ նույն ընտրատարածքում առաջադրված ՀՀԿ-ի որևէ թեկնածու իրեն մրցակից չէ։
«Իհարկե, ցուցակով մենք մրցակիցներ ենք, բայց այն տեսակը, որ ես եմ բերում, կարծում եմ՝ խիստ տարբերվելու է։ Մենք գալիս ենք ասելու, որ ես իմ փորձով, մեր երիտասարդներն էլ՝ իրենց խանդավառությյամբ և գիտելիքներով կարողանալու ենք անել այն, ինչ մնացած քաղաքական ուժերը չեն կարողացել անել տարիներ շարունակ»,- ասաց Անահիտ Բախշյանը։։

Հարցին՝ տեղեկություններ ունի՝ հատկապես որ քաղաքական ուժերն են ընտրակաշառք բաժանում, պատգամավորության թեկնածուն բացասական պատասխան հնչեցրեց։

«Ես էլ եմ նման բաներ լսել։ Բայց ընդամենը լսել եմ։ Ինչ չեմ տեսել, չեմ հավատում։ Միայն Աստծուն չեմ տեսել, բայց հավատում եմ։ Իսկ ընտրակաշառք բաժանողների ու վերցնողների չեմ տեսել։ Երբ լրատվամիջոցները կոնկրետ այդպիսի փաստեր հրապարակեն, կհավատամ։ Միաժամանակ, ուզում եմ ասել, որ մեր հասարակության քաղաքացիական գիտակցության աստիճանն այսօր անհամամետա բարձր է, քան 5 տարի առաջ։ Ընտրողը ճիշտ կողմնորոշվելու է և ընտրելու է այն քաղաքական ուժին, որին վստահում է։ Իսկ ո՞ւմ է վստահելու. նրան, ով նախորդ տարիների ընթացքում խնդիրներ է բարձրացրել և լուծել։ Իմ պարագայում դրանք շատ-շատ են»,- ասաց Անահիտ Բախշյանը։

Նա միաժամանակ շնորհավորեց բոլոր կանանց Մարտի 8-ը՝ նշելով, որ թե իգական, և թե արական սեռի ներկայացուցիչների իրավունքներն, առանց խտրականության, պետք է պաշտպանվեն տարին կլոր, ոչ թե բացառապես տոնական օրերին։

Անահիտ Բախշյանն այսօր անդրադարձ կատարեց կուսակցության նախընտրական ծրագրի հատկապես այն կետերի վրա, որնք վերաբերում են երիտասարդների կրթության իրավունքին։

«Մենք վարկավորման մի ծրագիր ենք առաջարկելու, որի դեպքում բուհի և բանկի համագործակցության արդյունքում ուսանողի վրայից հանվելու է անձամբ գնալու, վարկ վերցնելու բեռը։ Բացի այդ՝ առաջարկելու ենք մագիստրոսական կրթությունը դարձնել 1 տարի, ինչպես աշխարհի մյուս քաղաքակիրթ երկրներում։ Երիտասարդ ընտանիքների համար ևս ունենք լուրջ առաջարկներ։ Այն միլիոնավոր դոլարները, որոնք ստվերում են, խոստանում ենք բերել տնտեսություն՝ խթանելու ծնելիությունը»,- ասաց նա։