Չավուշօղլուն Գերմանիայի իշխանությունների մասին. «Իսկական բռնապետական համակարգ է»

Քաղաքական 20:08 08/03/2017 Աշխարհում

Թուրքիայի նախագահ Ռեջեփ Թայիփ Էրդողանից հետո այժմ էլ արտգործնախարար Մևլութ Չավուշօղլուն է Գերմանիայի իշխանությունների գործողությունները նմանեցրել նացիստական գործելաոճին:

«Էրմենիհաբեր»-ը գրում է, թուրքական «T24» լրատվական կայքի տեղեկացմամբ՝ Գերմանիայի Համբուրգ քաղաքի իշխանությունները թույլ չէին տվել սրահներից մեկում անցկացվելիք միջոցառումը, որտեղ ելույթ էր ունենալու նաև արտգործնախարար Չավուշօղլուն: Սակայն այնուհետև հայտարարվել է, որ Չավուշօղլուի ելույթի համար այլ սրահ կհատկացվի: Իսկ մինչ այդ Գերմանիայի տեղական ինքնակառավարման մարմիններն արգելել էին Արդարադատության նախարար Բեքիր Բոզդաղի, Էկոնոմիկայի նախարար Նիհաթ Զեյբեքջիի, և Էներգետիկայի նախկին նախարար Թաներ Յըլդըզի ելույթները:

Աղբյուրը նշում է, որ թուրք պաշտոնյաների հանդիպումները անցկացվում են սահմանադրական փոփոխությունների հանրաքվեի քարոզարշավի շրջանակներում:

Ըստ Չավուշօղլուի՝ գերմանական իշխանությունների պահվածքը նման է նացիստների գործելաոճին: «Իսկական բռնապետական համակարգ է: Փորձել են չեղարկել Համբուրգում հարսանյաց սրահում միջոցառում անցկացնելու համաձայանությունը»:

Չավուշօղլուն հայտարարել է, որ մեկնելու է Գերմանիա և իրեն ոչ ոք չի կարող կանգնեցնել:

Աղբյուրը հիշեցմում է, որ Թուրքիայի նախագահ Ռեջեփ Թայիփ Էրդողանը քննադատել էր Գերմանիայի իշխանություններին այն բանի համար, որ վերջիններս արգելել են սահմանադրական փոփոխությունների հանրաքվեի քարոզարշավի անցկացումն ու թուրք պաշտոնյաների ելույթները Գերմանիայի տարածքում:

Էրդողանը գերմանական իշխանությունների այդ վերաբերմունքը նմանեցրել էր նացիստական գործելաոճին՝ ասելով. «Էյ, Գերմանիա, դուք ժողովրդավարության հետ ոչ մի առնչություն չունեք: Ներկայումս ձեր քայլերը, չեն տարբերվում անցյալում նացիստականից: Մենք էլ կարծում էինք, թե Գերմանիան վաղուց հրաժարվել է դրանից, բայց սխալվել ենք»:

Սպասենք, թե երբ Գերմանիան կպատասխանի Թուրքիային ու հարց կտա՝ ո՞վ է խոսում դեմոկրատիայից, նացիզմից...:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: