Ձեր վստահելի աղբյուրը

Հասարակական կարծիքի ուսումնասիրության համառուսաստանյան  կենտրոնը (ВЦИОМ)  «Շանթ» հեռուստաընկերության պատվերով փետրվարի 22-26 –ը Հայաստանում անցկացրել է  «Սոցիալ-քաղաքական իրավիճակը Հայաստանում խորհրդարանական ընտրությունների նախաշեմին» սոցիալական հարցում:  Հարցմանը մասնակցել է 1600 հոգի Հայաստանի ողջ տարածքից:

Ներկայացնելով հարցման արդյունքները, կենտրոնի գլխավոր տնօրեն Վալերի Ֆյոդորովն ասաց, որ ընտրություններից առաջ Հայաստանում գրանցվել է երկրում տիրող իրավիճակի նկատմամբ դժգոհության բարձր մակարդակ՝  78 տոկոս, հարցվածներից յուրաքանչյուր երկրորդը՝ 51 տոկոս, նշում է վերջին տարիներին իրավիճակի վատթարացման մասին: Հիմնական խնդիրներից են՝ գործազրկություն, ճանապարհների վիճակ, աղքատություն, շրջակա միջավայրի աղտոտվածություն և այլն:

Կարեն Կարապետյանի վարչապետ նշանակվելուց հետո  կառավարության գործունեությունը հարցվածների  31 տոկոսը գնահատել է՝  միանաշանակ դրական,  46 տոկոսը՝ ավելի շուտ դրական:  

Հարցման համաձայն՝ Հայաստանի ազգաբնակչությունը խիստ քաղաքականացված է: Հարցվածների մեծ մասը տեղայկ են, որ ապրիլի 2-ին կայանալու են խորհրդարանական ընտրություններ: Հարցվածների 72 տոկոսն ասել է, որ  հաստատ մասնակցելու են ընտրություններին: Վ. Ֆյոդորովն ասաց, որ հաշվի առնելով հարցման մերժումների չափաբաժինը՝ ընտրություններին մասնակցության կանխատեսվող մակարդակը  կազմում է 62 տոկոս:
 Հարցին, թե ո՞ր կուսակցությանը կամ կուսակցությունների  դաշինքի օգտին կքվեարկեիք, եթե կայանար ընտրություններն առաջիկա կիրակի. 26 տոկոս՝  «Ծառուկյան» դաշինք,  19  տոկոս՝ ՀՀԿ, 3 –ական տոկոս՝ «Ելք» դաշինք, ՀՅԴ,  2 տոկոս՝ «Հայկական վերածնունդ», 1-ական տոկոս՝ ընտրություններին մասնակցող մյուս ուժերը:

Ներկայացնելով նաև տարածքային թեկնածուներից ում օգտին քվեարկեիք հարցի արդյունքները, կենտրոնի տնօրենն ասաց, որ առաջատար կուսակցությունների հնարավորությունները հավասարվում են՝ «Ծառուկյան» դաշինք՝ 25 տոկոս, ՀՀԿ՝ 23 տոկոս:

Նախընտրական անցումային շեմում են գտնվում՝՝ «Ելք» դաշինք, ՀՅԴ, «Հայկական վերածնունդ» կուսակցություն:

Նա ասաց, որ ՀՀԿ-ի վարկանիշը կապված է վարչապետ Կարեն Կարապետյանի բարձր վարկանիշով, նա բարձր աջակցություն ունի հասարակության շրջանում:
Ընտրություններից մեկ ամիս առաջ ընտրողների մեկ երրորդը դեռևս չի որոշել, թե ում օգտին են քվեարկելու կամ հրաժարվում են հայտնել  իրենց ընտրություն մասին: Դրանով է պայմանավորված, կենտրոնի տնօրենի խոսքով, էլեկտորալ պատկերի նշանակալի փոփոխականությունը: Վ. Ֆյոդորովն ասաց, որ զարգացումները մեծապես կախված են լինելու ընտրարշավի ընթացքից: