Ձեր վստահելի աղբյուրը

Արագածոտնի մարզի Ծաղկահովիտ համայնքում բնակիչների հետ նախընտրական հանդիպմանը «Հայկական վերածնունդ» կուսակցության նախագահ Արթուր Բաղդասարյանը դիմելով հավաքվածներին ասաց. «Հայաստանում մեկնարկում են ընտրությունները, ամեն մի կուսակցություն այցելում է, ներկայացնում է իր մոտեցումները, դուք էլ պետք է լսեք մարդկանց, նայեք նրանց հեռուստատեսային ելույթները և կատարեք ճիշտ ընտրություն, ճիշտ քվեարկություն»։

ՀՎԿ նախագահը նշեց, որ մինչ Ծաղկահովիտ հասնելը հաշվել է 14 արագաչափ կա. «Նայեք այս գյուղերի թշվառ վիճակը։ 2012 թվականի կեսերից մինչև 2014-ի վերջը Հայաստանում դրվել է 2մլն 536 հազար հատ արագաչափ, 2015-16-ին դրանց թիվն էլ ավելի է աճել։ Հաշվեք, թե դրանցով որքան գումար է գանձվել ժողովրդից, իսկ այդ փողով որքան խնդիր կլուծվեր երկրում»։

Բաղդասարյանի խոսքով՝ իրենք շատ պարզ, իրատեսական ծրագիր են ներկայացնում, որի իրականացումը Հայաստանում բերելու է հույս, լույս ու փոփոխություն։

«Ապրիլի 3-ին կյանքը չի ավարտվելու, կյանքը շարունակվելու է։ Պետք չէ մտածել, որ մինչ այդ ինչ հնարավոր է պոկել։  Ապրիլի 2-ին գնացեք ճիշտ քվեարկեք՝ խղճով, սրտով, մտքով։ Ջիգյարով, սրտանց քվեարկեք, որ այս երկրում մի բան փոխվի»,-կոչ արեց նա։