Ձեր վստահելի աղբյուրը

Այսօր Կոնդ թաղամասում «Կոնգրես-ՀԺԿ» դաշինքի անդամները հանդիպում են անցկացրել բնակիչների հետ, ՀԱԿ փոխնախագահ, դաշինքի անդամ Լևոն Զուրաբյանը ներկայացրել է իրենց դաշինքի խաղաղության ծրագիրը: Այդ ընթացքում մի կին մոտեցավ ու ասաց. «Ամեն մարդ պետք է իր տարածքում միկրոֆոն վերցնի, խոսի: Սերոբ, տարեք ձեր տարածք»:

Լևոն Զուրաբյանն արձագանքեց. «Հայաստանը բաժանել եք խանությունների՞»:

Կինն ասաց, որ չի բաժանել:

«Ես չեմ կարծում, որ դուք եկել եք ՀՀԿ շտաբի մոտ  ձեզ գովերգելու: Ասում ենք՝ ազատեք տարածքը: Նեղվում եմ, որ մեր անցուդարձին այս պահին խանգարում եք»,- ասաց  կինն ու հեռացավ:

Նա չցանկացավ ներկայանալ: 

Լևոն Զուրաբյանը շնորհակալություն հայտնեց տիկնոջը. «Ավելի մեծ նվեր դժվար էր անել մեր քարոզարշավին: Բաներ կան, որ ասում ես, մտածում են՝ սուբյեկտիվ ես խոսում, ապացույցներ չես ներկայացնում: Բայց երբ ապացույցը իր ոտքով, քայլելով գալիս է, մտնում լրատվամիջոցների ուշադրության կենտրոն, ապացուցում է մեր ասած խոսքերը, մեզ ավելի լավ նվեր դժվար էր անել»:

Խոսելով իրենց խաղաղության ծրագրի մասին, Լ. Զուրաբյանն ասաց, որ երկիրն անպաշտպան վիճակի մեջ է հայտնվել, արագ պետք է քայլեր ձեռնարկել աղետը կանգնեցնելու համար և տարածաշրջանում խաղաղություն հաստատել:

«Դրա համար կա խաղաղության ծրագիրը, որը մենք առաջարկում ենք մեր ժողովրդին: Ամեն ինչ պետք է անենք, որ այդ խաղաղությունը հաստատվի»,- ասաց նա:

Պատասխանելով լրագրողի հարցին, թե արդյո՞ք ձեր շտաբը ստացել է  ընտրակաշառք բաժանելու վերաբերյալ ահազանգեր, Լ. Զուրաբյանն ասաց, որ բազմաթիվ տեղեկություններ են ստանում:

«Մեր գրասենյակ են եկել քաղաքացիներ, ասում են՝ այստեղ են գազի հաշիվների փակման համար հերթագրվում: Մենք ասել ենք, իհարկե, չգիտենք նման բան: Այսինքն մեր գրասենյակի մերձակայքում մի տեղ կա, որտեղ նման հերթագրում են անում: Բազմաթիվ տեղեկություններ ունենք՝ քաղաքացիներին ասում են գնացեք, հերթագրվեք, եթե համաձայն եք քվեարկել մեր օգտին, հետո ձեր գազի, լույսի  հաշիվները կփակենք, տարբեր տեսակի ծառայություններ են խոստանում»,- ասաց ՀԱԿ փոխնախագահը:

Նա նաև հայտնեց, որ իրենք հանդիպել ենք ԵԱՀԿ դիտորդների հետ, բոլոր տեղեկությունները ներկայացրել են առաքելության ղեկավարին. «Այնպես չէ, որ իրենց համար նորություն էր դա»: