Ձեր վստահելի աղբյուրը

Ազատ դեմոկրատներ կուսակցության քարոզարշավն այսօր շարունակվեց Դավիթաշեն, Արաբկիր և Աջափնյակ վարչական շրջաններն ընդգրկող թիվ 2 ընտրատարածքում։ Կուսակցության անդամներ Անահիտ Բախշյանը, Ստյոպա Սաֆարյանը, փոխնախագահ Անժելա Խաչատրյանը նախընտրական ծրագրի դրույթները ներկայացնող բուկլետներ բաժանեցին անցորդներին, զրուցեցին մետրոյի «Բարեկամություն» կայարանի անցման տակ առևտուր անող քաղաքացիների հետ։

Թիվ 2 ընտրատարածքում Ազատ դեմոկրատներից պատգամավորության թեկնածու առաջադրված Արմեն Առաքելյանը լրագրողների հետ զրույցում նշեց՝ ի տարբերություն քաղաքական մյուս ուժերի՝ իրենք գտնում են, որ Հայաստանի դերն ու տեղը Եվրամիությունն է։ «Ամեն ինչ անելու ենք, որ Հայաստանը ԵՏՄ-ից դուրս բերելու գործընթաց սկսվի։ Մեր երկիրը պետք է դուրս գա այս մեռելածին կազմակերպությունից, որը վնասից բացի՝ ոչինչ չի տվել։ Երկրորդ, մենք գտնում ենք, որ առաջնահերթ կերպով պետք է վերացվի ստվերը։ Նույնիսկ պաշտոնական տվյալներով, երկրում 34 տոկոս ստվեր գոյություն ունի։ Ստվերային միջոցների բացահայտումը բյուջեին տարեկան կավելացնի 1 միլիարդ դոլար։ Մենք գիտենք ստվերի տեղը, գիտենք՝ ում ձեռքում է և գիտենք, թե ինչպես այն վերահսկենք»,- ասաց պատգամավորության թեկնածուն։

Արմեն Առաքելյանը նկատեց, որ արատավոր տնտեսական հարաբերությունների հետևանքով Հայաստանում «բենզինի մենաշնորհը պատկանում է պողոսին, շաքարավազինը՝ պետրոսին», միչնդեռ այս կարծարատիպը կոտրելուց հետո ժողովուրդը սեփական մաշկի վրա կզգա տնտեսական վիճակի բարելավումը։

«Ծրագրային մեր մյուս կարևոր դրույթներից մեկն էլ ԵՄ-ի հետ առանց վիզային ռեժիմի հաստատումն է։ Ստորացուցիչ է, երբ հարևան երկիրն առանց վիզային ռեժիմի ելումուտ ունի Եվրոպա, իսկ մենք՝ ոչ։ Խորհրդարանում հայտնվելուց հետո մենք անելու ենք ամեն ինչ, որպեսզի Հայաստանը ԵՄ-ի հետ ունենա առանց վիզային ռեժիմ։ Դա առաջինն առողջապահական, այնուհետ կրթական խնդիրներ կլուծի։ Մարդիկկ կարողանան հանգիստ մեկնել Եվրոպա՝ բուժման կամ կրթություն ստանալու»,- նկատեց կուսակցական գործիչը։

Անդրադառնալով ղարաբաղյան հակամարտության կարգավորման հարցում Ազատ դեմոկրատների դիրքորոշմանը, Արմեն Առաքելյանը շեշտեց՝ խնդրի կարգավորումն իրենք տեսնում են փաթեթային տարբերակով։ «Փուլային տարբերակը մեր դեպքում կիրառելի չէ։ Փաթեթային տարբերակով պետք է լուծենք և՛ վիճելի տարածքների, և՛ կարգավիճակի, և՛ անվտանգության հարցերը։ Հայաստանը պետք է միջոցներ ներդնի, որպեսզի մյուս երկրները ճանաչեն Արցախի անկախությունը»,- ամփոփեց պատգամավորության թեկնածուն։