ՀՀ Նախագահը հանդիպել է Ֆրանսիայի Սենատի նախագահ Ժերար Լարշեի հետ
Պաշտոնական այցով Ֆրանսիայի Հանրապետությունում գտնվող Նախագահ Սերժ Սարգսյանը երեկ երեկոյան հանդիպում է ունեցել Ֆրանսիայի Սենատի նախագահ Ժերար Լարշեի հետ:
ՀՀ նախագահի աշխատակազմի հասարակայնության և տեղեկատվության միջոցների հետ կապերի վարչության հաղորդմամբ, զրուցակիցները համակարծիք են եղել, որ հայ-ֆրանսիական միջխորհրդարանական երկխոսությունը շարունակելու է հատուկ դերակատարում ունենալ երկու բարեկամ երկրների հարաբերությունների ամրապնդման գործում:
Սերժ Սարգսյանը գոհունակությամբ է նշել, որ Հայաստանի Ազգային ժողովը եվրոպական բազմաթիվ երկրների խորհրդարանների, այդ թվում` Ֆրանսիայի Սենատի հետ բարեկամական կապերի բարի ավանդույթ է ձևավորել, որն անհրաժեշտ է պահպանել և զարգացնել:
Նախագահ Սարգսյանի գնահատմամբ, հայ-ֆրանսիական հարաբերությունների ոգուն համահունչ` խորհրդարանական համագործակցությունը դրսևորվում է նաև բազմակողմ հարթակներում` Եվրոպայի խորհրդի, ԵԱՀԿ-ի, ՆԱՏՕ-ի խորհրդարանական վեհաժողովներում: Նախագահը բարձր է գնահատել Եվրոպական խորհրդարանում ֆրանսիական պատվիրակության անդամների պատրաստակամությունը մշտապես ուշադրության կենտրոնում պահելու Հայաստանին հուզող հարցերը։
Սերժ Սարգսյանը բարձր է գնահատել նաև Ֆրանկոֆոնիայի շրջանակներում Հայաստանի և Ֆրանսիայի արդյունավետ փոխգործակցությունը:
Հանդիպմանը անդրադարձ է եղել նաև ՀՀ-ԵՄ հարաբերություններին, ԼՂ հիմնախնդրի կարգավորման գործընթացին, տարածաշրջանային խնդիրներին ու մարտահրավերներին:
ՀՀ Նախագահը խոսել է նաև Հայոց ցեղասպանության միջազգային ճանաչման և դատապարտման գործում Ֆրանսիայի անուրանալի դերի մասին և շնորհակալություն հայտնել խորհրդարանականներին անհանդուրժողականության և ատելության դեմ հետևողական պայքարի համար:
Սերժ Սարգսյանը հանդիպման ավարտին գրառում է կատարել Սենատի Պատվավոր հյուրերի գրքում:
«Մեծագույն հաճույք է հյուրընկալվել պատմությամբ լեցուն այս վայրում` բարեկամ Ֆրանսիայի Սենատում։ Ամփոփելով ֆրանսիական հարուստ մշակութային բացառիկ ժառանգությունը՝ այն հիրավի հնի ու նորի գերազանց համակեցության վայր է։ Հպարտության և միևնույն ժամանակ հուզմունքի զգացողություն եմ ապրում՝ գտնվելով այստեղ, ուր 17 տարի առաջ ընդունվեց Հայոց ցեղասպանությունը ճանաչող օրենք, որը ևս մեկ անգամ ընդգծեց Ֆրանսիայի առաջատար դերը համամարդկային արժեքների պաշտպանության գործում և, իհարկե, անվերապահ համերաշխությունը հայ ժողովրդի հետ»,-գրել է Նախագահ Սարգսյանը։
Լուսանկարները՝ ՀՀ նախագահի պաշտոնական կայքից:
Հարակից հրապարակումներ`
- Փարիզում կայացել են հայ-ֆրանսիական բարձր մակարդակի բանակցությունները
- ՀՀ նախագահ. Փարիզում առևտուրն անգամ արվեստ է, իսկ արվեստը՝ կենսակերպ
- Նախագահը հանդիպում է ունեցել Ֆրանսիայի Ազգային Ժողովի նախագահ Կլոդ Բարտոլոնի հետ
- Սերժ Սարգսյան. Հրավիրում ենք ֆրանսիական ընկերություններին ներդրումներ կատարել Հայաստանում
- Սփյուռքը համաշխարհային տնտեսության մեջ Հայաստանի ինտեգրման հուսալի և ամենաարդյունավետ կամուրջ է. ՀՀ նախագահ
- Մեկնարկել է նախագահ Սերժ Սարգսյանի պաշտոնական այցը Ֆրանսիայի Հանրապետություն
- Սերժ Սարգսյանը մեկնել է Ֆրանսիա
Լրահոս
Տեսանյութեր
Աշխարհի առաջնությունից առաջ ինձ «подножка տվեց» Սիմոն Մարտիրոսյանը. Փաշիկ Ալավերդյան
