Ձեր վստահելի աղբյուրը

«Մենք խոսում ենք խնդիրների մասին, առաջարկում ենք լուծումներ»:  Կոտայքի մարզկենտրոն Հրազդանում քաղաքացիների հետ նախընտրական հանդիպման ժամանակ հայտարարեց Օհանյան-Րաֆֆի-Օսկանյան դաշինքի ներկայացուցիչ, արտաքին գործերի նախկին նախարար Վարդան Օսկանյանը:

Նա ասաց, որ փոփոխությունները չպետք է լինեն տասնամյակներ անց, ապագայի համար, ժամանակ չկա, դրանք պետք է լինեն հենց այսօրվա համար:
«Կան երկու տեսակի խնդիրներ: Խնդիրներ, որնք կարելի է լուծել առաջին օրվանից, առաջին ժամից, իսկապես դրա համար ոչ մի ռեսուրս պետք չէ, քաղաքական կամք է պետք ընդամենը: Կան խնդիրներ, որոնց լուծումը իհարկե, ժամանակ է պահանջում: Բայց մեր ժողովուրդը պետք է զգա, որ նոր իշխանության դեպքում այդ հեռակա խնդիրների լուծման ուղղությամբ ամեն օր քայլեր են արվում»,-ասաց Օսկանյանը:

Մինչ դաշինքի ծրագիրը հավաքավածներին ներկայացնելը նա նշեց, կարևոր է, հավատալ, որ ընտրությունների միջոցով հնարավոր է իշխանություն փոխել:
«Հավատացեք դրան, ես գիտեմ, որ այսքան տարիներ դուք հիասթափվել եք անընդհատ, բայց այդ հույսը երբեք չպետք է մեռնի, դա իշխանության ցանկությունն է, եկեք վերակենդանացնենք դա նորից, հնարավոր է քվեարկության միջոցով իշխանափոխություն անել: Եթե իշխանափոխություն եղավ, իշխանության եկան մարդիկ, ովքեր ունեն տեսլական, նվիրում ու փորձ, հավատացեք, որ ամենակարճ ժամանակում երկրում հնարավոր է իրավիճակ փոխել»,-նկատառումները ներկայացրեց նա:

Օսկանյանը կոչ արեց չհավատալ բոլոր նրանց, ովքեր կփորձեն համոզել, թե ստեղծված իրավիճակը օբյեկտիվ պատճառների հետևանք է.
«Ո´չ, մի հավատացեք, որ մենք այսպես պետք է շարունակենք ապրել, քանի որ փոքր երկիր ենք, ռեսուրսներ չունենք, շրջափակման մեջ ենք, ԼՂ խնդիր ունենք: Ո´չ, այսօրվա վիճակի պատճառը իշխանության անգործությունն է, նրանց տեսլականի պակասն է, նրանց մոտ ցանկություն չկա որևէ բան փոխելու, նրանց հետաքրարքում է երկու բան՝ աթոռ և փող: Հայաստանն ունի մեծ հնարավորություններ և ներսում, և դրսում, ունի Սփյուռք»:

Նա նշեց, որ իրենց նախընտրական խոստումներն իրականացնելու համար ռեսուրսների պակաս չեն ունենալու:

«Մենք մեր ծրագրում դրել ենք բարձրացնել աշխատավարձերը, դրանք շատ ցածր են, հնարավոր է շատ արագ բարձրացնել, մենք կսկսենք բանակից, որովհետև անվտանգության խնդիրն առաջնային է: Մենք առաջին օրվանից բարձրացնելու ենք պայմանագրային զինծառայողների աշխատավարձը, հասցնելու ենք 250 հազար դրամի, դա էապես նպաստելու է բանակի պրոֆեսիոնալիզմի»:

Օսկանյանն ասաց, նախատեսում են սպայի աշխատավարձը ևս բարձրացնել,՝ հասցնելով 480 հազար դրամի:
Դաշինքի համապետական ցուցակի երկրորդ հորիզոնականում գտնվող Արմեն Մարտիրոսյանն ասաց, հայ զինվորի ու սպայի ոգին անկոտրում է, բայց խախաղության հաստատումն ու նվտանգության ապահովումը չպետք է թողնել նրանց կամքին ու ինքազոհողությանը:

«Մենք պարտավոր ենք ապահովել այնպիսի միջավայր զինվորի ու սպայի համար և արտաքին քաղաքականության, և նյութատեխնիկական ապահովման տեսանկյունից, որ պայքարի  միակ գրավականը չմնա ինքնազոհողությունը»:

Պաշտպանության նախկին նախարար, Արցախի հերոս Սեյրան Օհանյանը, ով գլխավորում է դաշինքի ընտրական ցուցակը, հրազդանցիներին ասաց, որ այս ընտրությունների արդյունքում ձևավորվելու է ողջ իշխանությունը:

«Անցած 25 տարիների ընթացքում մենք լճացման պահեր ենք ապրել և քաղաքակիրթ աշխարհի հետ համահունչ գնալու ցանկություն ունենք մենք բոլորս»,-ասաց նա:

Օհանյանն ասաց, որ իրենց թիմում փորձառու, բարոյական ազնվություն ունեցող մարդիկ են:
«Այսօր մեզ պետք են կանգուն, տոկուն, բարոյապես ազնիվ մարդիկ, որոնց համար գործից առավել ոչինիչ կարևոր չէ: Մեզ համար անչափ կարևոր է  ՀՀ յուրաքանչյուր քաղաքացին, մենք մարդակենտրոն գործունեություն ենք ծավալելու: Ես այսօր պատրաստ եմ առաջնորդելու կտրուկ ու կոշտ բարեփոխումները Հայաստանում: Ես այսօր պատրաստ եմ առաջնորդելու կարգ ու կանոն հաստատելու Հայաստանում, մենք պատրաստ ենք իրական քայլերով, իրական արդյունքներով ջախջախել հուսալքության այն մթնոլորտը, որ գույություն ունի Հայաստանում»,-ասաց Օհանյանը:

Նախկին ԱԳ նախարար Օսկանյանն ասաց, որ քաղաքացիներն ընրություն են կատարելու սևի ու սպիտակի միջև. «Մի կողմը իշխանություններն են, որ տապալել են ամեն ինչ, մյուս կողմը ընդդիմությունն է: Ձեր ձայնն առաջին հերթին որոշեք տալ ընդդիմությանը: Մենք կոչ ենք անում ձեր քվեն մեզ տալ, մենք 8 համարն ենք»:

Նշենք, որ Հրազդանում ՕՐՕ-ի ներկայացուցիչներին դիմավորեցին աղ ու հացով, մինչ այստեղ հասնելը դաշինքի անդամները ծաղիկներ դրեցին Հայրենական մեծ պատերազմին նվիրված հուշակոթողին: