Ձեր վստահելի աղբյուրը

«Հայաստանի Հանրապետական» կուսակցության նախընտրական ծրագրում տնտեսական դրույթները խարխսված են չորս հիմնական կետեր վրա,- «Կոնրադ Ադենաուեր» հիմնադրամի նախաձեռնած «Քարոզարշավ բոլորի համար» քննարկման ասաց   ՀՀԿ խորհրդի անդամ Դավիթ Սարգսյանը՝ ներկայացնելով տնտեսական ծրագրային դրույթները:

Թվարկելով հիմնարար կետերը՝ մակրոտնտեսական, ֆինանսական կայունության շարունակական ապահովում,  ներդրումային միջավայրի համար պայմանների հետագա բարելավում և ներդրումների ապահովում,  բիզնես նախաձեռնությունների, հատկապես ՓՄՁ ոլորտին աջակցության տրամադրում, տնտեսական հավասար մցակցային պայմանների ապահովում,  նա նշեց, որ սրանց վրա ներկայացված է այն տեսլականը, միջոցառումները, անելիքները, որոնք իրենց կուսակցությունն առաջարկում է և տեսնում որպես հիմնական անելիք առաջիկա տարիներին:

«Իհարկե, առաջին հիմնական կետերը շարունակում են մնալ գործարար միջավայրը, գործարար միջավայրում առկա խութերը, վարչարարության հետ կապված ոչ հավասար կիրառումը: Բոլոր խոչընդոտների վերացման արդյունքում  աջակցություն պետք է ստանա ինչպես փոքր ու միջին ձեռնարկատիրության ոլորտը, այնպես էլ ողջ գոծարար միջավայրը»,- ասաց Դ. Սարգսյանը:

Նրա խոսքով, բավարար չեն այն ներդրումների մակարդակը, որ գոյություն ունի: Ծրագրում, Դ. Սարգսյանն ասաց, որ ներկայացված են այն ծրագրերը, անելիքները, միջոցառումները, որոնք պետք է բերեն ներդրումների ծավալի աճ:

Նա նշեց, որ ծրագրում ներկայացված են նաև ճյուղային ոլորտները՝ գյուղատնտեսություն, զբոսաշրջություն, ներկայացված են այն միջոցառումները, որոնք պետք է իրականացվեն այդ ոլորտներում զարգացում ապահովելու համար: Առանձին անդրադարձ կա ենթակառուցվածքներին, դրանց արդյունավետ կառավարմանը և այդ ոլորտներում անելիքներին: 

Խոսելով վերջին տարիներին տնտեսության ոլորտում ձեռքբերումների մասին, նա նշեց, որ վերջին հինգ տարում ներդրումներ են արվել առողջապահության ոլորոտւմ՝ մարզերում ունեն ամբողջությամբ վերանորոգված, նոր տեխնոլոգիաներով հիվանդանոցներ, հեռահաղորդակցության ոլորտում են արձանագրվել ձեռքբերումներ: Դ. Սարգսյանի խոսքով,  միջին աշխատավարձը վերջին 5-7 տարում ավելացել է, բայց, իհարկե, բավարար չէ:

«Իհարկե, իմ կարծիքով կան շատ ձեռքբերումներ, կան նաև շատ խնդիրներ, որոնք մեզ դեռ չի հաջողվել լուծել»,- ասաց ՀՀԿ ներկայացուցիչը՝ հավելելով, որ  որպես թիրախային կետ  ընտրել  են միջնաժամկետ հատվածում 5-6 տոկոս տնտեսական աճի ապահովումը:

«Ելք» կուսակցությունների դաշինքից Մանե Թանդիլյանը ներկայացելով իրենց դաշինքի ծրագրի տնտեսական դրույթները, ասաց, որ իրենք ներկայացում է ոչ թե ինչ, այլ ինչպես:

«Այն թեման, թե ինչ պետք է անել, որպեսզի երկիրը դուրս գա այս վիճակի, բոլորս ասում ենք, գիտենք, այդ պատճառով շեշտադրումներ ենք կատարել քայլերի վրա, թե ինչ քայլերով է դա պետք անել»,- նշեց նա:

Մ. Թանդիլյանն ասաց, որ երկրում արդարադատության չգոյության, կոռումպացված համակարգի պայմաններում հնարավոր չէ զարգացնել տնտեսությունը:  Նա նաև նշեց, որ տնտեսության զարգացման հիմքը միջին խավն է, որը Հայաստանում շատ փոքր է, չնչին: 

«Մեզ անհրաժեշտ է վերականգնել միջին խավի գոյությունը, արտոնություններ տրվեն փոքր և միջին ձեռնարկություններին»,- ասաց «Ելք» դաշինքի ներկայացուցիչը:

Նրա խոսքով, իրենք առաջարկում են մինչև 500 միլիոն դրամի շրջանառություն ունեցողներին հարկել շրջանառության հարկով:

«Մեր հարկային վարչարարությունը շատ բարդ է, շատ հաճախ մահակ է տնտեսվարողների գլխին, ուղղակի որպես պատժամիջոց է կիրառվում: Պետք է ՓՄՁ-ներին տալ ընդլայնվելու հնարավորություն»,- նշեց նա՝ հավելելով, որ իրենք առաջարկում են նաև ներառել ՓՄՁ օմբուդսմենի ինստիտուտ, քանի որ այսօրվա Հայաստանի պայմաններում նրանք անպաշտպան են:

Մ. Թանդիլյանի խոսքով, իրենց ծրագրում շեշտադրումներ են արված նաև ոլորտային զարգացումների վրա, մասնավորապես ՏՏ ոլորտի, առաջարկում են արմատապես վերանայել մաքսազերծման խոչընդոտները: 

«Ծառուկյան» կուսակցությունների դաշինքից Մեսրոպ Առաքելյանն ասաց, որ երկրում վարվող տնտեսական քաղաքականության արդյունքում Հայաստանում ձևավորվել է վստահության ճգնաժամ, ինչի արդյունքում ունեն մակրոտնտեսական հիմնական ցուցանիշների վատթարացում, բնակչության  զգալի մասն ունի բարեկացության ապահովման հետ կապված լուրջ խնդիրներ,  1 միլիոնից ավելի աղքատ բնակչություն, վերջին տաս տարվա ընթացքում 350 հազարի ավելի արտագաղթ:

Նա նշեց, որ «Ծառուկյան» դաշինքն առաջարկում է 15  առաջային կետի իրականացում, որը հնարավորություն կտա կարճ ժամկետում որոշ չափով կարգավորել հասարակության բարեկեցության հետ կապված խնդիրները, մասնավորապես առաջարում են կենսաթոշակների, նվազագույն աշխատավարձի բարձրացում, էլեկտրաէներգիայի, գազի սակագների նվազում, փոքր և միջին բիզնեսի համար երեք տարի հարկային արտոնությունների տրամադրում բոլոր հարկատեսակների գծով, վերջին տարիներին կուտակված 60 միլիարդի չափով հարկային տույժերի ամբողջությամբ համաներում:

«Նշված ծրագրերն առարկայական են, չափելի, կարճ ժամկետում իրականացվող: Այս տարվա ընթացքում արդեն հնարավոր է  որոշակի բարեկեցության ապահովում, որը հնարավորություն կտա տնտեսության որոշակի աշխուժացում»,- նշեց Մ. Առաքելյանը:

«Ծառուկյան» դաշինքի ներկայացուցչի խոսքով, ակնկալում են տարեկան 6 տոկոս ՀՆԱ աճ:  Նա ասաց, որ մի շարք այլ ծրագրերի իրականացումը, հարկային օրենսդրության բարեփոխումները կնպաստեն ներդրումների աճին, բարեկեցության բարձրացմանը:

Հարցին, թե կենսաթոշակերի, աշխատավարձերի բարձրացումը, ՓՄՁ-ներին հարկային արտոնություններ տալը ենթադրում են ծախսեր, որքանո՞վ է հնարավոր դա անել, Մ. Առաքելյանն ասաց, որ իրենց ծրագրերի իրականացման համար պետք է առավելագույնը 60-70 միլիարդ լրացուցիչ հարկային մուտքեր:

«Որտեղից այդ գումարը: Ճանապարհները մի քանիսն է, 6 տոկոս տնտեսական աճը բյուջեի համար կապահովի նվազագույնը 4-5 տոկոս հարկային մուտքերի ավելացում, առկա ստվերային տնտեսության զգալի հատվածի կրճատումը բյուջետային մուտքեր կապահովի, ինչպես նաև մենք բյուջետային ծախսերի արդյունավետությունը գնահատում ենք բավական ցածր»,- ասաց «Ծառուկյան» դաշինքի ներկայացուցիչը: