Ձեր վստահելի աղբյուրը

«Սեզոնային փոփոխությունների ժամանակ, հատկապես գարնան սկզբին, սրվում են սրտանոթային հիվանդությունները: Ցավոք սրտի,  Հայաստանում մահերի մոտ կեսը բաժին է ընկնում հենց սրտանոթային հիվանդություններին»,- այս մասին այսօր լրագրողների հետ հանդիպման ժամանակ ժամանակ ասաց ՀՀ ԱՆ գլխավոր սրտաբան Համլետ Հայրապետյանը:

Այդ իսկ պատճառով, ըստ սրտաբանի, այս հիվանդությունների կանխարգելումն ու բուժումն ունի ոչ միայն առողջապահական լուրջ նշանակություն, այլև սոցիալական բնույթ է կրում:

Համլետ Հայրապետյանը հայտնեց, որ վերջին տարիներին լուրջ միջոցառումներ են ձեռնարկվել՝ սրտանոթային հիվանդություններից մահվան ցուցանիշը նվազեցնելու ուղղությամբ, մասնավորապես,  բուժումն ավելի հասանելի դարձնելու համար:

Սրտաբանը հիշեցրեց, որ Հայաստանում 2015 թվականի հունվարի 1-ից գործում է  Stent for Life պետական ծրագիրը, որի նպատակն է սուր ինֆարկտի ծանր դեպքերում, բժշկական համապատասխան ցուցումների առկայության պարագայում կյանքեր փրկել մեկ ստենտ տեղադրելով։  «Այդ գործողությունը ունի բարձր արդյունավետություն և հնարավորություն է տալիս խուսափել մահից»,- ասաց նա:

Համլետ Հայրապետյանը հայտնեց, որ երկու տարվա ընթացքում պետական ծրագրով կատարվել է ավելի քան 3000 ստենտավորում, անհրաժեշտության դեպքում, ըստ նրա, տեղադրվել է մեկից ավելի ստենտ: 

Նա նշեց, որ Հայաստանում 10 կլինիկաներ մասնակցում են այդ պետական ծրագրին: Կլինիկաներից 8-ը գտնվում են Երևանում, երկուս մարզերում, մասնավորապես,  Գյումրիում և Գորիսում:

«Կարող եմ գոհունակությամբ ասել, որ ծրագրի արդյունքում ունենք մահացության նվազում, խոսքը վերաբերում է հատկապես հոսպիտալային  մահացությանը, իսկ այդ ստենատավորված հիվանդների շրջանում մահացության ցուցանիշը հասնում է  3-4 տոկոս»,- ասաց Համլետ Հայրապետյանը:

Նա նշեց, որ ներկայումս պետության հնարավորությունները թույլ են տալիս կատարել մեկ նեղացած անոթի ստենտավորում, որը հանգեցրել է ինֆարկտի: «Եթե այդ անոթը բացելու համար անհրաժեշտ է տեղադրել 2-ը, ապա  2-րդ ստենտն էլ է դրվում ևս անվճար, սակայն խոսքը միայն ինֆարկտված անոթի մասին է: Իսկ, եթե հիվանդն ունի ևս այլ անոթների կամ տվյալ անոթի այլ հատվածի նեղացում, դրանք հետագայում կատարվում են պլանային ձևով՝ օրեր, շաբաթներ անց և վճարովի հիմունքներով»,- ընդգծեց Համլետ Հայրապետյանը:

Սրտաբանը հայտնեց, որ պետությունն այս ծրագրի համար տարեկան տրամադրում է 3 միլիոն դրամ, իսկ իրենց նպատակը մեկն է՝ հնարավորության չափով ընդգրկել  բոլոր հիվանդներին: «Մենք չենք կարող հիվանդին ասել՝ գումարը հոկտեմբերին վերջացել է, իսկ ձեր ինֆարկտը տեղի է ունեցել դեկտեմբերին: Մենք պետք է օգնենք բոլորին, ինչի համար էլ ոչ դեղապատ ստենտ է տեղադրվում: Պետք է հասկանալ, որ ինֆարկտի ժամանակ կարևորը անոթը բացելն է, արյան հոսքը վերականգնելը, ուստի տեղադրվում է ոչ դեղապատ ստենտ»,- ասաց Համլետ Հայրապետյանը: