Ձեր վստահելի աղբյուրը

ՀՀ վարչապետ, Հանրապետական կուսակցության նախագահի առաջին տեղակալ Կարեն Կարապետյանը կուսակցության անդամների հետ միասին 2017 թվականի խորհրդարանական ընտրությունների քարոզարշավի շրջանակում նախօրեին այցելել է ՀՀ Սյունիքի մարզի մի շարք համայնքներ:

Lovearmenia.am-ի փոխանցմամբ, Կարեն Կարապետյանը Գորայք, Սիսիան և Գորիս համայնքների ընտրողներին է ներկայացրել ՀՀԿ նախընտրական ծրագրի դրույթները, նախատեսվող բարեփոխումները և պատասխանել նրանց հուզող մի շարք հարցերի՝ տնտեսական զարգացման, աշխատատեղերի ստեղծման, պետական կառավարման համակարգի բարեփոխման, տարածքային ու համայնքային համաչափ զարգացման վերաբերյալ:

«Մեր բացթողումները, մեր դրական ու ուժեղ կողմերը հասկանալով՝ հայտարարում ենք, որ ուզում ենք փոխվել, փոխվում ենք ու փոխելու ենք: Մեր տնտեսական զարգացման ծրագրի  հիմքում այն գաղափարն է, որ մեր երկրի հիմնական առավելությունը, հիմնական կապիտալը մարդն է՝ իր կարողություններով, ստեղծագործ աշխատանքով, և պետք է բոլոր պայմանները  ստեղծենք, որպեսզի մարդը կարողանա իր աշխատանքով իր տունը պահել, իրեն ոչ ոք չխանգարի, արդարություն  լինի, աշխատանքն արժանավայել  գնահատվի, հնարավորություն տանք նրան, որպեսզի ստեղծի հավելյալ արժեք: Ներկայացրել ենք ծրագրեր ճյուղ առ ճյուղ՝ առողջապահություն, գյուղատնտեսություն, արդյունաբերություն, սոցիալական ոլորտ, կրթություն, նույնիսկ պետական կառավարման համակարգ: Երբ ասում ենք՝ պետք է փոխվենք և մեզանից պետք է սկսենք, առաջին հերթին նկատի ունենք պետական կառավարման համակարգը:  Մենք շատ բան ունենք փոխելու, բայց ծրագրի մեջ խուսափել ենք ու չենք գրել արհեստական ու ականջը շոյող ոչ մի բան: Գիտենք՝ ինչ պրոբլեմ ունենք, ինչ հիվանդություն ունենք և ինչպես ենք շարժվելու առաջ: Մեզ սպասվում է քրտնաջան, կանոնավոր, ամենօրյա աշխատանք: Մենք իրականում շանս ունենք որոշ ժամանակ անց ունենալ բարվոք պետություն, որով բոլորս կարող ենք հպարտանալ», - դիմելով սյունեցիներին՝ ասել է ՀՀԿ առաջին փոխնախագահը:

Կարեն Կարապետյանը նախ և առաջ ընդգծել է, որ ՀՀԿ-ն  շատ հստակ ձևակերպել է իր վերաբերմունքն Արցախի հիմնախնդրի լուծման առնչությամբ.  «Արցախում, որտեղ հերոսաբար  իրենց պարտքն են կատարել նաև բազմաթիվ սյունեցիներ, որոշվում է մեր ինքնասիրությունը, մեր արժանապատվությունը, մեր վաղվա օրը, ընդհանրապես մեր կեցվածքը,թե  ինչպես ենք կանգնելու աշխարհի առաջ»:
ՀՀԿ առաջին փոխնախագահը մանրամասներ է ներկայացրել տարածքային կառավարման և համաչափ զարգացման տեսլականի վերաբերյալ՝ շեշտելով, որ յուրաքանչյուր մարզի առանձնահատկությունների հիման վրա մշակվել են զարգացման կոնկրետ ծրագրեր: 

«Սյունիքի մարզի հետ կապված մենք ունենք մեր պատկերացրած զարգացման հստակ ծրագիրը հետևյալ հիմնական շեշտադրումներով՝ անասնապահություն, գյուղատնտեսություն, հանքարդյունաբերություն: Մենք ունենք հարևան բարեկամ երկիր՝ Իրան, որի հետ մեր համագործակցությունը բավական պասիվ է և այդ առումով  ունենք մեծ ծրագիր. Մեղրիի սահմանին  ստեղծելու ենք ազատ տնտեսական գոտի: Այս պահին արդեն բանակցությունները վարում ենք, և հենց այսօր Տնտեսական զարգացման և ներդրումների նախարարն իրանական կողմի իր գործընկերոջ հետ ստորագրում է մի պայմանագիր, որով Հայաստանի տարածքում գործելու է իրենց որակավորման՝ «Հալալի» ինստիտուտը: Մենք փորձելու ենք Սյունիքի մարզի անասնապահությունն ու գյուղատնտեսությունն ուղղել դեպի իրանական շուկա: Գյուղատնտեսության և անասնապահության զարգացման համար նաև ստեղծել ենք Գյուղատնտեսության զարգացման հիմնադրամ, որի հիմնական նպատակը ոչ միայն ֆինանսական աջակցությունն է կամ սուբսիդավորումը, այլև բիզնեսի ձևավորմանն ու կազմակերպմանն աջակցելը», - ասել է Կարեն Կարապետյանը:

Խոսելով 2017 թ. ակնկալվող ներդրումների ծավալի և ներդրումային ծրագրերի մասին՝ ՀՀ վարչապետը նշել է, որ կա հստակ ձևակերպված ծրագիր և տեսլական, թե յուրաքանչյուր ոլորտով ինչպես են շարժվելու առաջ, որոնք են այսօրվա խնդիրներն ու առավելությունները: 

ՀՀԿ նախագահի առաջին տեղակալը նաև մեծապես կարևորել է կրթության դերը երկրի զարգացման  գործում՝ ներկայացնելով նախատեսվող բարեփոխումները կրթական համակարգում:  «Առանց կրթության մենք ուղղակի ապագա չունենք: Եթե ուզում ենք լավ ապրել, ապահով ապրել, անվտանգ ապրել, ուղղակի պետք է խելացի լինենք: Վաղվա օրը խելացի և կիրթ քաղաքացու օրն է:  Եթե մենք գյուղական համայնքներում որակյալ կրթական համակարգ չենք ապահովում, ուղղակի մեր ապագայի տակ քար ենք դնում», - նշել է Կարեն Կարապետյանը՝ անդրադառնալով խելացի կառավարման կարևորության հարցին:

«Մեր կառավարման հիմնական թեզը հետևյալն է լինելու. մենք պետք է գանք մի վիճակի, որ մեր հանրապետության մի մեծ զանգված չիմանա՝ վարչապետն ով է: Եթե մարդը լավ է ապրում, մեղավորի չի փնտրում: Աշխարհը շուռ ենք տալու խելացի կառավարմամբ: Դրանում մեծ դեր ունի նաև տեղեկատվական տեխնոլոգիաների ոլորտը: Բազմաթիվ հանդիպումներ եմ ունեցել ոլորտի բիզնեսմենների հետ: ՏՏ-ն այն ճյուղն է, որից ես՝ որպես վարչապետ մեծ օգնության, աջակցության կարիք ու նաև սպասելիքներ ունեմ:   Մենք այլ բանաձև չունենք  քան խելացի ու կիրթ լինելը: Պետք է փոխվենք ոչ միայն մենք, պետք է փոխվենք բոլորս»: 

Կարեն Կարապետյանի խոսքով՝ ՀՀԿ-ն հանրության առջև հանդես է գալիս պատասխանատվությամբ և անհանգստությամբ վաղվա օրվա նկատմամբ: «Ես այս աշխատանքին անցել եմ շատ մեծ վճռականությամբ, որպեսզի բոլորս միասին այնպիսի երկիր կառուցենք, որ մեր երեխան, թոռը երբևէ չմտածեն երկրից գնալու մասին», - ընդգծել է ՀՀԿ առաջին փոխնախագահը: