Ձեր վստահելի աղբյուրը

Հայաստանը շատ ինտենսիվ երկխոսություն է ծավալում հարևան Իրանի հետ, այսօր «Վալդայ» բանավեճի միջազգային ակումբի երևանյան արտագնա նիստում ասաց ՀՀ պաշտպանության նախարար Վիգեն Սարգսյանը:

«Իրանը Հայաստանի անկախության առաջին օրերից դրսևորել է մեծ իմաստնություն ու քաղաքակրթություն՝ հաստատելով հավասարակշռված հարաբերություններ Հայաստանի ու տարածաշրջանի երկրների հետ, ինչպես նաև կարողացել է ցուցաբերել հավասարկշռված դիրքորոշում արցախյան հիմնախնդրի հարցում՝ մշտապես առաջարկելով իր միջնորդական առաքելությունը և առաջնորդվելով միջնորդների առաքելությանը չվնասելու սկզբունքով», -ասաց Վ. Սարգսյանը:

Նախարարի խոսքով, Իրանի նման դիրքորոշումը կտրուկ կերպով հակասում է Հայաստանի  մեկ այլ հարևանի՝ Թուրքիայի դիրքորոշմանը:

«Թուրքիան ոչ միայն շրջափակման է ենթարկել Հայաստանը՝ փակելով երկաթգծային ճանապարհներն ու պետական սահմանը, որը մեր կարծիքով, 21-րդ դարում անախրոնիզմ է, այլև ղարաբաղյան հիմնախնդրի հարցում պրոադրբեջանական դիրքորոշում է որդեգրել», -հավելեց Վ. Սարգսյանը:

Նախարարը կարծիք հայտնեց, որ շրջափակման ենթարկելով Հայաստանը և փակելով Հայաստանի հետ սահմանը, Թուրքիան ինքն է «մեկուսացվել Հարավային Կովկասի տարածաշրջանից»:

«Չնայած Վրաստանի հետ մտերիմ, իսկ Ադրբեջանի հետ եղբայրական հարաբերություններին, Թուրքիային այսօր դժվար է համարել տարածաշրջանային խաղացող», -ասաց Վ. Սարգսյանը: