Ձեր վստահելի աղբյուրը

Ռուսաստանի ռազմավարությունը տարածաշրջանի բոլոր երկրների հետ  բարեկամական հարաբերություններ ունենալն է:  «Վալդայ» բանավեճի միջազգային ակումբի երևանյան նիստի շրջանակում լրագրողների հետ զրույցում ասաց ՌԴ ԳԱԱ Արևելագիտության ինստիտուտի ղեկավար Վիտալի Նաումկինը՝ անդրադառնալով Հայաստան-Ռուսաստան և Ռուսաստան-Ադրբեջան հարաբերությունների,  Ռուսաստանի կողմից Ադրբեջանին զենք վաճառելու վերաբերյալ հարցերին։

«Սա շատ սուր հարց է, որը չեն ընդունում մեր հայ գործընկերները։ Եկեք ասենք ուղղակիորեն, որ մենք ապրում ենք հետխորհրդային տարածքում, որտեղ Ռուսաստանի ռազմավարական գիծը այն է, որ ունենա բարեկամական հարաբերություններ տարածքում եղած բոլոր պետությունների հետ։ Հարցն այն չէ, որ Ռուսաստանը կատարում է որոշ գործողություններ, որոնք կարող են վնասել Հայաստանին, ես կարծում եմ, որ դա լիովին բացառված է»,- ասաց Վիտալի Նաումկինը։

Դիտարկմանը, որ այդ  զենքից են կրակում Լեռնային Ղարաբաղի վրա՝ Վիտալի Նաումկինն արձագանքեց, որ զենքի վաճառքի շուկան այսօր ազատականացված է և կամայական երկրից կամայական զենք է հնարավոր գնել:

«Ռուսաստանի և Ադրբեջանի միջև կա ռազմատեխնիկական համագործակցություն, այն ոչ ոք չի հերքում։ Սակայն կարծում եմ՝ այն զսպող գործոն է և օգնում է, որ, այնուամենայնիվ, այդ զենքերը չկիռավեն ո՛չ ԼՂ ժողովրդի հանդեպ, ո՛չ Հայաստանի»,- ասաց ՌԴ Արևելագիտության ինստիտուտի գիտական ղեկավարը։

Բայց չէ՞ որ կիրառվում է, լրագրողների այս պնդմանը նա պատասխանեց. «Կանգնեցնել դա, ցավոք, մենք չենք կարող, բայց ես այնուամենայնիվ համարում եմ, որ  հարաբերություններն ու գործընկերությունը Ռուսաստանի և Ադրբեջանի միջև զսպող գործոն է, ոչ թե գործոն, որը դրդում է Ադրբեջանին որոշակի ոչ ցանկալի քայլերի։ Իսկ ի՞նչ կլիներ եթե դա լիներ թուրքական զենք, կամ ամերիկյան, կամ չինական։ Դա ազատ շուկա է։ Պետությունները սպառազինության շուկայում վարում են ազատ քաղաքականություն։ Նրանք, իհարկե, հաշվի են առնում, որ ունեն ռազմավարական գործընկերներ։ Ոչ ոք այսօր չի կարող հերքել, որ Ռուսաստանը Հայաստանի համար անվտանգության մատակարար է, Ռուսաստանը երբեք թույլ չի տա, որ Հայաստանին վնասեն կամ հարձակվեն Հայաստանի վրա, ով էլ հարձակվի Հայաստանի վրա՝ Ռուսաստանը մասնակցելու է Հայաստանի պաշտպանությանը, դա բացարձակ ակնհայտ է և երկրորդը Ռուսաստանն էներգակիրների մատակարար է։ Սա ավտոմատ կերպով անէական է դարձնում մնացած ամեն ինչ»։