Ձեր վստահելի աղբյուրը

Քարոզարշավի շրջանակներում այսօր «Ծառուկյան» դաշինքի առաջնորդ Գագիկ Ծառուկյանը հանդիպեց Գեղարքունիքի մարզի Վարդենիս քաղաքի բնակիչների հետ։ Նրան այստեղ դիմավորեցին զուռնա-դհոլով, աղ ու հացով։

«Խերով ըլնի ոտդ, Ծառուկյան ջան»,- դիմավորելով  Դաշինքի առաջնորդին՝ ասացին վարդենիսցիները:

Գագիկ Ծառուկյանն իր ելույթում անդրադարձավ իրենց Դաշինքի ներակայացրած ծրագրին,  նաև խոսեց 2012թ-ի խորհրդարանական ընտրություններից և ներկայացրեց  ԲՀԿ-ի կոալիցիա չկազմելու պատճառները:

«Մենք ավելի շատ ձայն էինք հավաքել և ի՞նչն էր պատճառը, որ կոալիցիա չմտանք, մեզ ավելի շատ նախարարներ, պաշտոններ էին տալիս: Չեմ մտել, քանի որ այն քարոզարշավի ժամանակ տված խոստումները ես չէի կարող կատարել, միայն պետք է իմ թիմակիցներին տեղավորեին: Խնդիր չէինք լուծելու, օրենք չէինք փոխելու: Բոլորը կասկածում էին՝ չէ, Ծառուկյանը կմտնի կոալիցիա: Ծառուկյանը ժողովրդի վստահությունը չի կորցնելու, Ծառուկյանն այդ վստահությունը կրկնապատկելու, եռապատկելու է և անհնարինն իր ժողովրդի համար անելու է: Գործն է մնայուն, սիրելի ժողովուրդ»,- ասաց Դաշինքի առաջնորդը:

Գագիկ Ծառուկյանը վարդենիսցիներին նույնպես հորդորեց խղճի կամոք ընտրություն կատարել: Ըստ նրա՝ որոշողը, կատարողը ժողովուրդն է:

«Ցանկացած արտասահմանցի Հայաստանում տեսնում է մեր ժողովրդի ջերմությունը, հյուրասիրությունը: Ես հպարտանում եմ, իրոք լավ ժողովուրդ ենք, հյուրասեր, կամեցող ժողովուրդ ենք, բարի ենք, բայց այսօր բարությունը մի քիչ չարության է վերածվել՝ ժողովրդի չունենալու, վարկերի, երեխաների հոգսերը չլուծելու  պատճառով: Մենք պետք է աշխատենք, որ այդ ժպիտը, վստահությունը, հավատը պարգևենք մեր ժողովրդին»,- նշեց Գագիկ Ծառուկյանը:

Վարդենիսցիների հետ հանդիպման ժամանակ «Ծառուկյան» դաշինքի առաջնորդը նաև ասաց՝ ԿԸՀ նախագահ պարոն Մուկուչյանը չի թողնում, որ ինքը ժողովրդի հետ հանդիպի, խոստումները կատարի: «Ինձ չի թողնում ժողովրդի հետ հանդիպեմ կամ որևիցե մի բան ասեմ, որ ապրիլի 2-ից հետո կկատարենք:  Ասում է՝ դա ընտրակաշառք է: Ես ընտրակաշառք չեմ բաժանում, սիրելի ժողովուրդ ջան, ես իմ ժողովրդին սիրում եմ, չի կարող մեկն ասել, որ Ծառուկյանին դիմել է և անպատասխան է մնացել»,- ասաց  Գագիկ Ծառուկյանը: