Ձեր վստահելի աղբյուրը

Հայաստանի Կոմունիստական կուսակցությունից թիվ 4 ընտրատարածքում առաջադրված թեկնածու, ՔԱԳՎ նախկին պետ, ՀՀ Հանրային խորհրդի օդային տրանսպորտի քաղաքականության հարցերի ենթահանձնաժողովի նախագահ Դմիտրի Աթբաշյանը Panorama.am-ի հետ զրույցում ասաց, որ երբեք չի դադարել կրել կոմկուսի գաղափարախոսությունը։

«Համարում եմ, որ նախկին սովետական միության կոմունիստական կուսակցությունից երբեք էլ դուրս չեմ եկել, կուսկացության գրքույկը մինչև հիմա էլ պահում եմ ինձ մոտ, շարունունակում եմ կրել կուսակցության գաղափարները»,-ասաց նա։

Ինչ վերաբերում է արդեն մեկ շաբաթ ընթացող նախընտրական քարոզարշավին՝ մեր զրուցակիցն ասաց, որ մասնակցել է մի քանի հանդիպումների և մարդկանց հարցերից զգում է, որ բոլորին հետաքրքրում է  ավիացիայի ճակատագիրը։

«Մարդիկ դժգոհ են այն դրությունից, որը ստեղծվել է քաղավիացիայի ոլորտում։ Մենք պայքարում ենք, որ կարգավորենք քաղավիացիայի իրավաբանական դաշտը։ Կոմկուսն առաջարկում է քաղավիացիայի մասին նոր օրենսգիրք մշակել։ Կարող եմ ասել, որ կուսակցությունում իմ բոլոր առաջարկներն ընդունում ու հասկանում են»։

Հարցին, թե այնուամենայնիվ ինչպես է գնահատում ՀԿԿ-ի՝ խորհրդարան անցնելու շանսերը՝ Աթբաշյանը պատասխանեց. «Շատ քիչ»։