Ձեր վստահելի աղբյուրը

Սյունիքի մարզում նախատեսվում է իրականացնել  55 մլն դոլարի ներդրում, որը վերաբերում է տարբեր ոլորտներին: Այս մասին այսօր Կապանում բնակիչների հետ հանդիպման ժամանակ հայտարարեց ՀՀ վարչապետ, ՀՀԿ նախագահի առաջին տեղակալ Կարեն Կարապետյանը՝  ներկայացնելով այն ծրագրերը, որոնք նախատեսում են կյանքի կոչել:

Վարչապետը կապանցիներին հայտնեց, որ ներկայումս քննարկումներ են ընթանում  Մեղրիում ազատ տնտեսական գոտի ստեղծելու ուղղությամբ: 

Կարեն Կարապետյանը նշեց նաև, որ Ռուսաստանի, Վրաստանի, Բելառուսի և Ղազախստանի իր գործընկերներին առաջարկել է իրենց երկրների կապիտալը ներգրավվել Մեղրիում բացվելիք ազատ տնտեսական գոտում։ 

«Քննարկել ենք, որ այս հարթակը օգտագործեն, ազատ տնտեսական գոտում ներդրումներ անեն և դուրս գան իրանական շուկա»,- ասաց վարչապետը:

Նրա խոսքերով՝  այսօր Հայաստանի առևտրաշրջանառությունը հարևան Իրանի հետ շատ քիչ է։

«80 մլն-ից ավելի բանկչություն ունեցող Իրանում մեր առևտրաշրջանառությունը չափազանց ցածր է, մինչդեռ այնտեղ կարող ենք ֆոնոմենալ աճ ունենալ: Այսօր մեր առևտրաշրջանառությունը կազմում  է 50-70 մլն դոլար ՝ չհաշված էներգետիկ ոլորտը: Թող ամպագոռգոռ չհնչի, բայց մենք կարող ենք այդ թիվը հասցնել 1 միլիարդի»,- նշեց Կարեն Կարապետյանը:

Վարչապետի տեղեկացմամբ, առևտրաշրջանառության ծավալների ավելացման ուղղությամբ մի շարք ծրագրեր  են նախատեսվում իրականացնել: Մասնավորապես, իրանական գործընկերների հետ ստեղծվելու է արտահանող ընկերություն, որը հայկական շուկայից կգնի ապրանքը և կարտահանի Իրան: Նա անդրադարձավ նաև «Հալալ» ինստիտուտի ներդրմանը՝ հավելելով, որ արտահանման ծավալը մեծացնելու նպատակով Հայաստանում բացվել է «Հալալ» ընկերությունը, ինչը հնարավորություն կտա հայ տնտեսվարողներին  սերտիֆիկացում ստանալ ընկերությունից և ապրանքներ արտահանել Իրան:

Կարեն Կարապետյանը նաև նշեց, որ հաշվի առնելով Սյունիքի մարզի առավելություններն ու առանձնահատկությունները՝  շեշտը դրվելու է հանքարդյունաբերության, անասնապահության, գյուղատնտեսության զարգացման վրա: