Ձեր վստահելի աղբյուրը

«Օհանյան–Րաֆֆի–Օսկանյան» դաշինքի անդամներն այսօր քարոզարշավի շրջանակում Արմավիրի մարզում են: Մարզի Ջրառատ համայքում  բնակիչների հետ հանդիպմանը «Համախմբում» կուսակցության նախագահ, դաշինքի պատգամավորության թեկնածու Վարդան Օսկանյանն ասաց, որ իրենց դաշինքի ծրագիրն ամենօրյա փոփոխությունների ժամանակացույց է: Նա նշեց, որ բարձրացնելու են աշխատավարձերը, երեխայի ծննդյան գումարը, գյուղացիների վարկերն են թեթևացնելու:

«Գյուղ առ գյուղ ծրագիր կա մշակված, որն իրականացնելու ենք: Այդ ամենի համար փող կա, ուղղակի մարդիկ սպասում են, որ երկրում արդարություն հաստատվի, դրսից մեծ գումարներ են գալու, ներդրումներ կարող ենք բերել»,- ասաց Վ. Օսկանյանը: 

Դաշինքը գլխավորող Սեյրան Օհանյանն իր խոսքում նշեց, որ այս ընտրությամբ միանգամից ընտրելու ենք  Հայաստանի ամբողջ իշխանությունը՝ Ազգային ժողով, կառավարոթյուն, նախագահ, դրա համար  յուրաքանչյուրը  պետք է լուրջ հետևություններ և ուսումնասիրություններ  անի:

«Հայաստանում տիրող իրականությունն առիթ է տալիս մեզ ասելու, որ մեզ կտրուկ փոփոխություններ են պետք: Եթե փոփոխությունները չլինեն, մենք լճացման մեջ ենք լինելու բոլոր առումներով՝ սկսած կառավարման համակարգից, տնտեսություն, մնացած ոլորտներ»,- նշեց պաշտպանության նախկին նախարարը:

Նա ասաց, թե՝ այնպես չէ, որ ոչինչ չի արվել, սակայն շատ դանդաղ քայլերով են առաջ գնում.  «Մեր առաջ գնալը նման է այն գործին, որը կոչում են մեկ քայլ առաջ, երկու քայլ հետ:  Դա մեզ ձեռնտու չէ, մեզ կտրուկ փոփոխություններ  են պետք, թռիչքային աճ է պետք»: