Ձեր վստահելի աղբյուրը

«Ոչ մի միության մասին երբեք չի կարող խոսք լինել: Միություններ չկան: Մենք դարաշրջան ենք մտել, երբ «միություն» նախկին հասկացությունն այլևս գոյություն չունի»,- Երևանում լրագրողների հետ հանդիպմանն ասաց ռուս քաղաքագետ,  «Վալդայ» ակումբի գիտական աշխատանքների գծով տնօրեն Ֆեոդոր Լուկյանովը՝  պատասխանելով ՌԴ-Թուրքիա-Ադրբեջան հնարավոր միության մասին հարցին:

Նշեք, որ ավելի վաղ Թուրքիայի նախագահը հայտարարել էր, թե Պուտինի հետ քննարկել է նաև Թուրքիա-Ռուսաստան-Ադրբեջան եռակողմ միություն ստեղծելու հարցը:

Ֆեոդոր Լուկյանովը օրինակ բերեց սիրիական հակամարտությունը լուծելուն ուղղված Ռուսաստան-Թուրքիա-Իրան համագործակցությունը. «Ինձ համար դա մոդել է: Դա նշանակում է, որ նրանք միությո՞ւն են կազմում:  Ոչ մի դեպքում: Կոնկրետ այս դեպքում  շահերը մասամբ  համընկել են, և հիմա նրանք փորձում են լուծել հիմնախնդիրը, դուրս հանել խնդիրը փակուղուց»:

Քաղաքագետը նշեց, որ Ռուսաստան-Թուրքիա-Ադրբեջանը երբեք միություն չեն կարող ստեղծել, հեռանկար էլ չկա:

«Բայց երեք երկիր ունեն որոշակի հետաքրքրությունների շրջանակ, որոնք համընկնում են: Ես հասկանում եմ, թե ինչպես է այն ընկալվում Հայաստանում: Բայց հասկանալի է, որ այն միություն չէ, հնարավոր էլ չէ, որ լինի»,-ասաց նա՝ միաժամանակ հավելելով, որ  համընկող ոլորտները շատ փոքր են:

Ռուս քաղաքագետի խոսքով, Ռուսաստանը շատ լավ հասկանում է, որ այս ուղղությամբ ցանկացած քայլ Հայաստանին՝ որպես ՀԱՊԿ, ԵԱՏՄ անդամ, պետք է ներկայացնի, որ դա որևէ սպառնալիք չի լինելու նրա համար:

«Ռուսաստանը, որպես գերտերություն, իր հարաբերությունները կզարգացնի բոլոր նրանց հետ, ում հետ անհրաժեշտ է համարում, ոչ մի կասկած չունեմ», - ասաց նա:

Խոսելով մարտի 11-ին Երևանում կայացած «Վալդայ» միջազգային բանավեճի ակումբի՝  «Փոփոխությունների ժամանակը. Անկանխատեսելիությունը գլոբալ դարաշրջանում» թեմայով արտագնա նիստի մասին, ակումբի գիտական աշխատանքների գծով տնօրեն Ֆեոդոր Լուկյանովն ասաց, որ բավականին բովանդակային քննարկում է տեղի ունեցել, արծարծվեն են հարցերի լայն շրջանակ,  կարելի է նման  քննարկումներ անցկացնել նաև ԵՏՄ այլ երկրներում: