Ձեր վստահելի աղբյուրը

«Անընդունելի է, երբ որ հանրահավաքների ժամանակ փորձում են մարդկանց չթողնել կամ վիրավորել, որպեսզի գան, մասնակցեն հանրահավաքների: Դրանից ելնելով իմ թիմակիցների հետ միջադեպ է եղել»,- Վետերանների միավորման  վետերանների հետ հանդիպմումից հետո լրագրողների հետ զրույցում ասաց ՀՀ պաշտպանության նախկին նախարար, «Օհանյան-Րաֆֆի-Օսկանյան» դաշինքի համապետական ցուցակը գլխավորող Սեյրան Օհանյանը՝ պատասխանելով հարցին, թե ի՞նչ է տեղի ունեցել նախօրեին Ջրառատում:

Նա նշեց, որ կռվից հետո  նաև փորձել են զենք կիրառել, բայց իր թիմակիցների հմուտ գործողություններով զենքը ձեռքից վերցվել է, հանձնվել  իրավապահ մարմիններին:

«Հիմա իրավապահ մարմիններն օրենքի շրջանակներում աշխատում են: Ես իրենց խնդրել եմ, հորդորել եմ, որ այդպես չի կարելի, երբ տեղի է ունենում միջադեպ, միայն մեկ կողմի մարդկանց են ձերբակալում: Ասել եմ՝ հավասարաչափ բոլորին կտանեք, այլապես  մենք այլ միջոցների կդիմենք, գոյություն ունեցող օրինական միջոցների»,- ասաց Ս. Օհանյանը:

Հարցին, թե բուն միջադեպի պատճառն ի՞նչն է եղել, նա պատասխանեց. «Չնայած փորձում են  ներկայացնել, որ հնուց եկած խնդիրներ կային, ես հասկանում եմ՝ մեր հանրահավաքում գտնվող մարդկանց թույլ չտալն է, որ մասնակցեն, և վիրավորելն է, հայհոյելն է, իսկ հայհոյանք տվողին ի՞նչ են անում Հայաստանում, պատժում են»:

Պատասխանելով հարցին, թե կրակոց եղե՞լ է, Ս. Օհանյանն ասաց. «Այո, կրակոց եղել է: Մնացած հարցերը՝ իրավապահներին»:

Հարցին, թե ունե՞ք ուղերձ միջադեպի  հեղինակներին, նա պատասխանեց. «Առաջարկում եմ քարոզարշավը քաղաքակիրթ, բարեկիթ ձևով տանել, օրենքներ չխախտել, մեկը մյուսին չվիրավորել, չտեղափոխել այդ ամենը կենցաղային, բակային ասֆալտի մակարդակի, միջանձնային հարաբերություններին: Մենք ոչ մեկին չենք վիրավում, քաղաքակիր ձևով ենք տանում, բոլոր քաղաքական ուժերն էլ մեզ համար առողջ մրցակիցներ են, մեր հայրենակիցներն են, Հայաստանի քաղաքացիներն են: Ի վերջո երբ ավարտվեն ընտրությունները, միասին ենք  չէ շարուանելու մտածել մեր երկրի մասին, միասին ենք ապրելու Հայաստանում»: