Ձեր վստահելի աղբյուրը

Կուսակցությունների, դաշինքների նախընտրական ծրագրերում կրթության ոլորտի վերաբերյալ սպասելիքներն ավելի մեծ էին, քան հանդիպեցի,-Panorama.am-ի հետ զրույցում ասաց կրթության փորձագետ Սերոբ Խաչատրյանը։

Մանրամասնելով ոլորտին վերաբերող կետերը ծրագրերում՝ մեր զրուցակիցն ասաց. «Հանրապետական կուսակցության նախընտարական ծրագրում կրթության ոլորտին վերաբերողը մասն, ըստ էության նույնն է, ինչ-որ վեց ամիս առաջ վարչապետ Կարեն Կարապետյանը ներկայացրել էր Ազգային ժողով՝ որպես կառավարության ծրագիր։ Այսինքն՝ կառավարության ծրագիրը, շատ քիչ բաներ ավելացրած-հանած, նրանք ներկայացրել են նախընտրական ծրագրում, որտեղ  չհանդիպեցի «աշակերտ», «ուսանող», «դասախոս» բառերը։ Այն ավելի շատ կառուցվածքային ընդհանուր ազգային կրթակարգ ստեղծելու մասին է։ Հարց է առաջանում՝ մինչև հիմա ինչու՞ ստեղծված չէր։

Կրթության փորձագետին զարմացրել է այն, որ Դաշնակցության ծրագրում կրթության մասին առանձին հատվածի չի հանդիպել։

«Ինձ համար դա մի քիչ անսպասելի էր, քանի որ այդ ոլորտը հանձնված է Դաշնակցության կառավարմանը և ենթադրվում էր, որ առաջիկայում էլ կցանկանային կառավարել։ Նախարարը դաշնակցական է, և այն ծրագիրը, որն իրականացնում է դաշնակցությունը, հայտնված է «Հանրապետական» կուսակցության ծրագրում։ Ինձ շատ հետաքրքիր էր, թե Դաշնակցության կրթական ծրագիրն ինչով կտարբերվի Հանրապետականից, բայց ընդամենը մի քանի ընդհանուր դատողություններ կային Դաշնակցության ծրագրում, որոնցից մեկը վերաբերում էր հատուկ կարիքներ ունեցող մարդկանց կրթությանը»։

Սերոբ Խաչատրյանը նշեց, որ «Ելք» դաշինքն ու «Ազատ դեմոկրատները» ցանկանում են կրթական ծրագրերը համապատասխանեցնել աշխատաշուկային ու ժամանակի պահանջներին։

««Ելք»-ի մոտ շատ կարևորված էր նաև կրթության ոլորտի ապակուսակցականացման խնդիրը, որ կուսակցությունների մասին օրենքում փոփոխություն կարվի և կարգելվի ոլորտի կուսակցականացումը։ Կարևոր էր նաև գյուղական դպրոցների հետ կապված կետը՝ դրանց աջակցություն ցուցաբերելու, լրացուցիչ կրթական ծառայություններ մատուցելու հետ կապված։ Այս կետերը փոքր-ինչ ավելի շատ են ընդգրծված կրթական համակարգի խնդիրների մեջ»,-ասաց նա։

«Ազատ դեմոկրատների» ծրագրային մոտեցումը փորձագետը հեղափոխական անվանեց. «Նրանք առաջարկում են ուսուցիչների շաբաթական դրույքի ծանրաբեռնվածությունը 22 ժամից դարձնել 18 ժամ։ Սա ուսուցիչներին շատ դուր կգա, դա ենթադրում է աշխատավարձի բարձրացում և ծանրաբեռնվածության նվազում։ Սրա համար անհրաժեշտ է լրացուցիչ ֆինանսավորում։ «Ազատ դեմոկրատները» նշել էին, որ հաղթելու դեպքում կփորձեն կրթության ֆինասնավորումն ավելացնել»։

Կոմունիստների առաջարկածի վերաբերյալ, որ բարձրագույն կրթությունը պետք է դարձնել անվճար ինչպես խորրհրդային տարիներին, Խաչատրյանն ասաց, որ ներկայումս դա ուղղակի նոստալգիա է, բայց ոչ իրատեսական հաշվարկ։

«Ընդհանուր գնահատական տալով, կարելի է ասել, որ նախընտրական ծրագրերում կրթության հանդեպ առանձնապես շատ մեծ ուշադրության չհանդիպեցի»,-ամփոփեց Սերոբ Խաչատրյանը։