Ձեր վստահելի աղբյուրը

Կոմունիստական կուսակցությունը հին է, բայց ոչ հնացած,-այսօր լրագրողների հետ հանդիպմանն ասաց ՀԿԿ համամասնական ցուցակը գլխավորող ԱԺ պատգամավորի թեկնածու Տաճատ Սարգսյանը:

Նրա խոսքով՝ 115-ամյակը բոլորող կուսակցությունն այս տարիների ընթացքում բազմաթիվ խոչընդոտների միջով է անցել, սակայն առայսօր չի շեղվել իր ուղուց և գաղափարախոսությունից:

Կոմկուսի ղեկավարը հիշեցնելով իրենց անցած ուղին ու խորհրդային տարիներին կատարած աշխատանքները՝ նշեց, իրենց կուսակցությունն այսօր հանրապետությունում ունի 49 կառույց:

Իսկ թե այսքան ժամանակ կոմկուսը որտեղ է եղել և ինչու չի հաջողվում խորհրդարանում հայտնվել նա ասաց. «Մենք այս տարիների ընթացքում եղել ենք այնտեղ, որտեղ պետք է: Ոչ մի հանկարծակիություն չկա մեր գալու մեջ: Չենք հայտնվել նախ այն պատճառով, որ այն ժամանակ իշխանավորները, ի դեմս Լևոն Տեր-Պետրոսյանի և Վազգեն Մանուկյանի, շրջանցելով օրենքը կուսակցության ձեռքից վերցրեցից  հիմնական գույքը՝ կուսակցությանը թողնելով փողոցում. Այդ պատճառով հայտնվեցինք ծանր վիճակում, հետո անարդար ընտրություններ են տեղի ունենում, հատկապես անարդար վերաբերմունք կար Կոմկուսի նկատմամբ»:

Ինչ վերաբերում է դաշինքներ կազմելուն՝ Տաճատ Սարգսյանի կարծիքով՝ դաշինք պետք է կազմեն այն կուսակցությունները, որոնք ունեն միանման գաղափարախոսություն:

«Մենք քաղաքական դաշտում չտեսանք որևէ մեկին, որի քաղաքականությունը, գաղափարախոսությունը համընկներ Կոմկուսին և ընտրեցինք առաջադիմական Կոմկուսին և ներառեցինք ցուցակում»,-ասաց նա:

Պատգամավորի թեկնածուն ընդգծեց, որ իրենք կողմնակից են այս իշխանությունների վարած արտաքին քաղաքականությանը՝ ԵԱՏՄ-ի մեջ մտնելու հետ կապված: Նրա խոսքով՝  վերականգնում են այն կապերը, որոնք խորհրդային ժամանակ կար:

Անդրադառնալով ներկայացված սոցհարցումներին, ըստ որոնց, կոմկուսին պատրաստ է ձայն տալ բնակչության մեկ տոկոսը, նա  նշեց, որ այդ հարցումները պատվերով են կատարվում. «Հարցումներն արվում են ոչ օբյեկտիվ, պատվերով, առաջին հերթին այնպիսի մարդկանց կողմից, ովքեր մեծ ֆինանսներ ունեն: Մենք այն կարծիքին ենք, որ ժողովուրդը մեզ հետ է և մենք ժողովրդի տրամադրությունը գիտենք»:

Լրագրողների հարցին, թե ինչ կարծիք ունեն այն տեսակետի մասին, որ ՀԿԿ-ին նմանեցնում են ՀՀԿ-ին, նա պատասխանեց. «Շատ երկար ու ձիգ տարիների պետք է անցնեն, որ ինչ-որ տեղ նմանվեն կոմկուսին, նրանք ուզում են մեր աշխատաոճին նմանվել, բայց չեն կարողանում»,-ասաց նա: