Ձեր վստահելի աղբյուրը

«Սեյրան Օհանյանը, Րաֆֆի Հովհաննիսյանը, Վարդան Օսկանյանը, որպես փորձառու պետական գործիչներ, իրենց ջանքերը միավորեցին, որպեսզի միասնական պայքարի  հնարավորություն ընձեռեն մեր քաղաքացիներին՝ դուրս գալու այս ճգնաժամային իրավիճակից, որում հայտնել է Հայաստանը»,- նախընտրական քարոզարշավի շրջանակում Եղեգնաձորում քաղաքացիների հետ հանդիպմանն ասաց «Ժառանգություն» կուսակցության փոխնախագահ, «Օհանյան - Րաֆֆի – Օսկանյան» դաշինքի պատգամավորության թեկնածու (դաշինքի համապետական ցուցակում 2-րդ համար) Արմեն Մարտիրոսյանը:

Նա նշեց, որ ճգնաժամը շատ խորն է, համակարգային, ճգնաժամը սպառնում է երկրի անվտանգությանը, շարունակականությանը:

«Ցանկացած պարագայում մենք պետք է հիշենք մի կարևոր հանգամանք՝ առանց արդյունավետ կառավարման համակարգի, առանց պատշաճ, ազնիվ, արդար պաշտոնատար անձանց, երկիրը զարգանալ չի կարող»,- ասաց Ա. Մարտիրոսյանը:

ՀՀ արտաքին գործերի նախկին նախարար, դաշինքի պատգամավորության թեկնածու (համապետական ցուցակում 3-րդ համար) Վարդան Օսկանյանը նշեց, որ ապրիլի 2-ին կայանալիք խորհրդարանական ընտրություններն օրինական ձևով իշխանափոխության հասնելու հերթական  հնարավորությունն է:

«Երկու բանի  պետք է հավատալ. առաջին՝ ընտրություններով հնարավոր է  իշխանափոխության հասնել, երկրորդ՝  իշխանափոխությունից հետո եթե գա նոր կառավարություն, նոր դեմքեր, նոր գաղափարներ, շատ արագ կարելի է մեր ժողովրդի այս ծանր իրավիճակը փոխել, լավացնել, երկիրը դնել զարգացման ճիշտ ճանապարհի վրա:  Ուզում եմ, որ այդ երկու բանին հավատաք, առանց հավատի մենք չենք կարողանա իսկապես իրականացնել իշխանափոխություն: Վախը ձեր միջից հանեք»,- ասաց Վ. Օսկանյանը:

Նա ներկայացեց իրենց դաշինքի ծրագրի հիմնական դրույթները՝ հավելելով, որ եթե իշխանափոխություն լինի, իշխանության գան արդար մարդիկ, երկիրը փողի պակաս չի ունենա:

«Մենք դատապարտված չենք այսպես ապրելուն»,- նշեց Վարդան Օսկանյանը:

ՀՀ պաշտպանության նախկին նախարար, դաշինքի համապետական ցուցակը գլխավորող Սեյրան Օհանյանն իր խոսքում ասաց. «Միայն մեկ բան եթե անենք, մնացածը կամաց-կամաց առաջ կշարժվի՝ արդարություն մտցնելը: Եթե արդարություն մտցնենք, ամեն ինչ կգտնենք, գումարները դրսից էլ կգան, ամենակարևորը՝ մենք մեր ներսից ենք այդ գումարները կգտնենք, որոնք ոչ արդյունավետ են օգտագործվում»:

Նրա խոսքով, անչափ կարևոր, պատասախանատու ժամանակահատված է ապրում ողջ հայ ժողովուրդը:

«Ապրիլի 2-ին մենք ընտրելու ենք մեր հայրենիքի ողջ իշխանությունը՝ Ազգային ժողով, կառավարություն, նախագահ, որը երկարատև՝ հինգամյա ժամանակահատվածում ղեկավարելու է մեր երկիրը: Մենք մեր թիմով որոշել ենք լինել ժողովրդի կողքին: Մենք մեր թիմը համալրել ենք փորձառու մարդկանցով»,- ասաց նա:

Ս. Օհանյանը նշեց, որ 25 տարի ծառայել է բանակում. «25 տարի ծառայելով հայկական բանակում, կարծում եմ, վատ չեմ ծառայել, լավ եմ ծառայել, ունեցել եմ նաև թերություններ, սխալներ, բայց հայկական բանակը, որը որ կայացած կառույց է, շարունակական զարգացման ապահովումն այսօրվա ղեկավարությունն իրականացնում է այն հենքի վրա, որ ութ ու կես տարիների ընթացքում ես եմ իրականացրել»: