Սեյրան Օհանյանը՝ Ջրառատի դեպքի մասին

Քաղաքական 17:48 14/03/2017 Հայաստան

Սեյրան Օհանյանը՝ Ջրառատի դեպքի մասին

«Ես հանձնարարել եմ, որպեսզի մեր գործընկերները զբաղվեն դրանով, մինչև վերջ պարզաբանեն»,-քարոզարշավի շրջանակներում Վայոց Ձորի մարզում լրագրողների հետ զրույցում ասաց «Օհանյան-Րաֆֆի-Օսկանյան» դաշինքի համապետական ցուցակը գլխավորող Սեյրան Օհանյանը՝ պատասխանելով հարցին, թե ի՞նչ է տեղի ունեցել այսօր Ջրառատում:

«Ինչքան գիտեմ՝ այդ կոնֆլիկտային իրավիճակը, կռիվը շարունակվել է դպրոցում, հետո գյուղամեջում, զենք է կիրառվել, դրանից ավելի ես չգիտեմ»,- նշեց նա:

Հարցին, թե թեման ի՞նչն է եղել, Ս. Օհանյանը պատասխանեց. «Չգիտեմ, հիմա զբաղվում են»:

Այսօր ավելի վաղ «Օհանյան-Րաֆֆի-Օսկանյան» նախընտրական շտաբի տեղեկություն էր տարածել, որ Ջրառատ գյուղում «Հայաստանի Հանրապետական» կուսակցության (ՀՀԿ) տեղական կառույցի ներկայացուցիչները զինված հարձակում են գործել «Օհանյան-Րաֆֆի-Օսկանյան» դաշինքի համակիրների վրա, որի արդյունքում կան վիրավորներ:

Քննչական կոմիտեի հաղորդմամբ, Ջրառատ գյուղում այսօր տեղի ունեցած միջադեպի առթիվ հարուցվել է քրեական գործ, որով նախաքննության կատարումը ՀՀ ՔԿ նախագահի կողմից հանձնարարվել է ՀԿԳ քննության գլխավոր վարչությանը։ Նախնական տվյալներով՝ ժամը 13։30-14-ի սահմաններում Ջրառատ գյուղի գյուղապետարանի մոտ տեղի է ունեցել վիճաբանություն, ծեծկռտուք, որի ժամանակ ինքնաձիգից հնչել են կրակոցներ։ Միջադեպի հետևանքով՝ երեք անձ տարբեր մարմնական վնասվածքներով տեղափոխվել են բժշկական կենտրոն։ Ստեղծվել է քննչական խումբ և այս պահին դեպքի վայրում աշխատում է քննչական խումբը՝ փորձագետների հետ միասին:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: